Sənaye və energetika

Ana səhifə

Azərbaycan gəmiləri Rusiyanın «Yuri Korçagin» yatağında ilk neft platformasının quraşdırılmasında iştirak edib

12 sentyabr 2009 11:32 (UTC +04:00)

Bakı. Nicat Mustafayev – APA-Economics. Rusiyanın «LUKoil» şirkəti Xəzərin Rusiya sektorunda, Həştərxandan 200 km aralıda yerləşən «Yuri Korçagin» yatağının mənimsənilməsinə başlayıb.

Azərbaycan Dövlət Neft Şirkətindən (ARDNŞ) «APA-Economics»ə verilən məlumata görə, bu məqsədlə ARDNŞ-in Xəzər Dəniz Neft Donanmasının gəmilərindən istifadə olunur. Nəhəng dəniz qurğularının – neft hasil edən platformaların daşınması üçün nəzərdə tutulmuş, yükgötürmə qabiliyyəti 18 min ton olan STB-1 özüboşaldan nəqletmə barjı 7 200 at gücünə malik «Nefteqaz-58» yedək gəmisi vasitəsilə Həştərxana göndərilib. On gün ərzində platforma ilgəklənərək, STB-1 barjına qaldırılıb və yatağa daşınıb. Platforma dənizin 20 metr dərinliyində «Azərbaycan» kran gəmisi vasitəsilə qaldırılaraq layihə nöqtəsində yerləşdirilib. Daha sonra qruntun 50 metr dərinliyinə vurulan 14 svayla dənizin dibinə bərkidilib. Xəzər Dəniz Neft Donanmasının «Aura», «Vadim Seyidov», «Om» və «Lyutoqa» yedək-təchizat gəmiləri bu prosesdə «Azərbaycan» kran gəmisinin işinə yardım göstərib. Platformanın yanında, açıq dənizdə svaylar üzərində yanalma körpüsü də inşa edilib ki, həmin körpüdə Xəzər dənizində ən böyük olan, 28 min ton həcmində «Yuri Korçagin» üzən neft anbarı dayanacaq. Platformadan hasil edilən neft bura yığılaraq, daha sonra tankerlərə yüklənəcək.

Qeyd edək ki, «Azərbaycan» kran gəmisi təxminən 15 il ərzində ABƏŞ-in icarəsində olmuş və «Əsrin müqaviləsi»nin həyata keçirilməsində iştirak edib.