Sənaye və energetika

Ana səhifə

Neftçilər günü münasibətilə “İki sahil” qəzetinin xüsusi buraxılışı nəşr edilib - FOTO

Neftçilər günü münasibətilə “İki sahil” qəzetinin xüsusi buraxılışı nəşr edilib - <font color=red>FOTO</font>

15 sentyabr 2009 10:25 (UTC +04:00)

Bakı-APA. 1994-cü il sentyabrın 20-də imzalanmış “Əsrin müqaviləsi”nin 15 illiyi və Neftçilər günü münasibətilə “İki sahil” qəzetinin xüsusi buraxılışı nəşr edilib. APA-nın məlumatına görə, rəngli, illüstrativ materiallardan geniş istifadə olunan 56 səhifəlik xüsusi buraxılış prezident İlham Əliyevin neft sənayesinin bir qrup işçisinə mükafatlar, fəxri adlar verilməsi üçün imzaladığı sərəncamla başlayır.

Sonrakı səhifədə ARDNŞ-in prezidenti Rövnəq Abdullayevin Neftçilər günü münasibətilə Azərbaycanın neft sənayesi işçilərinə təbriki dərc olunub. Təbrikdə vurğulanıb ki, ulu öndər Heydər Əliyevin böyük səyləri ilə 15 il əvvəl imzalanmış «Əsrin müqaviləsi» transmilli sazişlər nəticəsində Azərbaycanın enerji təhlükəsizliyi tam təmin olunub, həmçinin Avropa ölkələrinə ixrac və tranzit daşımaları üzrə öncül yerlərdən birini tutub.

ARDNŞ-in prezidenti Rövnəq Abdullayev ümummilli liderin işləyib hazırladığı neft strategiyasının bu gün prezident İlham Əliyev tərəfindən uğurla davam etdirildiyini, məhz bunun nəticəsində neft siyasətinin bəhrələrinin ölkənin ictimai-siyasi həyatının bütün sahələrində böyük canlanma yaratdığını diqqətə çatdırıb, Azərbaycanın iqtisadi qüdrətinin daha da möhkəmlənməsi üçün neftçilərin fədakar zəhmətini yüksək qiymətləndirib, onları peşə bayramları münasibətilə təbrik edib.

ARDNŞ-in prezidenti Rövnəq Abdullayevin xüsusi buraxılışda dərc olunmuş «Əsrin müqaviləsi»- bütün uğurların təməli» adlı yazısında Azərbaycanın neft sənayesinin təqribən 150 illik tarixi araşdırılır, «Əsrin müqaviləsi» imzalandıqdan sonra görülmüş işlərin nəticələri barədə ətraflı məlumat verilir. Qeyd olunur ki, «Əsrin müqaviləsi»nin 15 illik uğurları Azərbaycan rəhbərliyinin və neftçilərimizin xarici tərəfdaşlarla birgə apardıqları fəaliyyətin nəticəsidir. Yazı bu sözlərlə bitir: «Sevinirik ki, bütün bu dəyişikliklərdə ARDNŞ-in çoxminli əmək kollektivinin də böyük rolu var. ...Xalqımız əmin ola bilər ki, Dövlət Neft Şirkəti ölkəmizin iqtisadi qüdrətinin daha da möhkəmlənməsi naminə gərgin fəaliyyətini bundan sonra da əzmlə davam etdirəcəkdir”.

«Əsrin müqaviləsi»nin 15 illiyi və Neftçilər günü münasibətilə ARDNŞ-in rəhbər işçilərinin və şirkətin ayrı-ayrı sahələrinə rəhbərlik edən şəxslərin yazıları xüsusi buraxılışın maraqla oxunan materiallarıdır. Bu mənada, ARDNŞ-in birinci vitse-prezidenti, akademik Xoşbəxt Yusifzadənin «Neftçilərin peşə bayramı», şirkətin iqtisadi məsələlər üzrə vitse-prezidenti Süleyman Qasımovun «Maliyyə hesabatlarının beynəlxalq standartlara keçidi ARDNŞ-in uğurudur», sərmayələr və marketinq üzrə vitse-prezident Elşad Nəsirovun «Azərbaycanın dünya bazarında rəqabət aparmaq imkanları genişlənir», neft emalı üzrə vitse-prezident David Məmmədovun «Azərbaycan neft emalı məhsullarının ixracatçısı kimi dünya bazarlarında özünə layiq yer tutmuşdur», vitse-prezident Mikayıl İsmayılovun «Neftçilər öz peşə bayramlarını böyük ruh yüksəkliyi ilə qeyd edirlər», sosial məsələlər üzrə vitse-prezident Qorxmaz Hüseynovun «Neft strategiyasının uğurla həyata keçirilməsi sosial inkişaf proqramlarının tətbiqini sürətləndirir», ekologiya üzrə vitse-prezident Muxtar Babayevin «ətraf mühitə zərərli təsirlər aradan qaldırılır», kadr, rejim və informasiya texnologiyaları üzrə vitse-prezident Xalik Məmmədovun «ARDNŞ: daha işıqlı sabahlara doğru» sərlövhəli yazısı oxucuda neft şirkətinin fəaliyyəti barədə geniş təəssürat yaradır.

Azərbaycan Neft və Qaz Sənayesi İşçiləri Həmkarlar İttifaqı Respublika Komitəsinin sədri Cahangir Əliyevin, «Azneft» İstehsalat Birliyinin baş direktoru Səbuhi Əhmədovun, «Azəriqaz» İstehsalat Birlyinin baş direktoru Əkbər Hacıyevin, şirkətin ayrı-ayrı strukturlarına rəhbərlik edən Tofiq Qəhrəmanovun, Vaqif Əliyevin, Rövşən Həsənovun, Elman İsmayılovun, Səfixan Məmmədovun, Bədəl Bədəlovun, Rəşad Əliyevin, Azər Əliyevin, Kamal Abbasovun, İnayət Hüseynovun, Mübariz Mədətovun, Rizvan Abbasovun, İsgəndər Şirəlinin, Fəxrəddin İsmayılovun, Sadıq Sadıqovun, Həbib Yüzbaşıyevin və «İki sahil» qəzetinin baş redaktoru, əməkdar jurnalist Vüqar Rəhimzadənin yazıları da maraqlı faktlarla zəngindir.