Sənaye və energetika

Ana səhifə

Azərbaycanda Suveren Fondların Beynəlxalq Forumunun iclası keçiriləcək

23 sentyabr 2009 12:43 (UTC +04:00)

Bakı. Rəşad Süleymanov – APA-Economics. Oktyabrın 8-9-da Bakıda Suveren Fondların Beynəlxalq Forumunun (SFBF) iclası keçiriləcək. Bu barədə «APA-Economics»ə Azərbaycan Dövlət Neft Fondunun (ARDNF) mətbuat xidmətindən məlumat verilib.

Azərbaycan hökuməti və ARDNF-in təşkilatçılığı ilə keçiriləcək tədbirdə 20-dən artıq ölkənin suveren fondlarının yüksək səviyyəli nümayəndələri iştirak edəcəklər. İclasda qlobal iqtisadiyyatda və maliyyə bazarlarındakı inkişaf müzakirə ediləcək və Forumun gələcək fəaliyyətini müəyyənləşdirmək üçün iş planı razılaşdırılacaq. Tədbirdən sonra SFBF tərəfindən iclasa dair bəyanat hazırlanacaq və Bakı görüşünün yekunlarına dair mətbuat konfransı keçiriləcək.

Qeyd edək ki, SFBF Suveren Fondların Beynəlxalq İşçi Qrupunun 2009-cu il aprelin 5-6-da Əl-Küveyt şəhərində keçirilmiş iclasında yaradılıb. Suveren Fondların Beynəlxalq Forumu könüllü qrup olub, suveren fondların ümumi marağına dair məsələlər ətrafında fikir mübadiləsi aparmaq və Santyaqo prinsiplərini rəhbər tutaraq suveren fondların fəaliyyətlərinin inkişaf etdirilməsinə kömək etmək məqsədi daşıyır.