Sənaye və energetika

Ana səhifə

Azərbaycanın enerji istehsalçısı iki əhəmiyyətli elektrik xəttin təmirinə başlayıb

25 sentyabr 2009 09:50 (UTC +04:00)

Bakı. Nicat Mustafayev – APA-Economics. Azərbaycanın enerji istehsalçısı olan «Azərenerji» ASC dövlət əhəmiyyətli iki xəttin təmirinə başlayıb.

ASC-dən «APA-Economics»ə verilən məlumata görə, bunlar 330 kV-luq I «Abşeron» və 500 kV-luq II «Abşeron» xətləridir. Həmin traslarda yaşıl kütlənin təmizlənməsi və texniki baxışın həyata keçirilməsi nəzərdə tutulur. Artıq sentyabrdan etibarən I «Abşeron» hava xəttində əsalı təmirə başlanılıb. Buradakı bütün avadanlıqların saz vəziyyətə gətirilməsi istiqamətində əməli tədbirlər həyata keçiriləcək. Bunun ardınca isə II «Abşeron» xəttində təmir aparılacaq və analoji tədbirlər orada da davam etdiriləcək.

Bundan başqa, sistem əhəmiyyətli 220/110 kV-luq «Xırdalan» yarımstansiyasında da müəyyən işlər həyata keçirilir. Belə ki, burada daha güclü və müasir tələblərə cavab verən 250 MVt-lıq transformatorlar quraşdırılır.

Qeyd edək ki, «Sumqayıt Yüksək Gərginlikli Elektrik Şəbəkəsi»nin xidməti ərazisində olan 110 kV-luq «Sumqayıt-3» yarımstansiyasının istismar müddətini başa vurması ilə əlaqədar olaraq, oradakı avadanlıqlar demontaj olunur. Bununla paralel olaraq, tələbatçıların fasiləsiz elektrik enerjisi ilə təmin olunmaları məqsədilə yeni tikilən yarımstansiyanın yaxınlığında müvəqqəti yarımstansiya qurulub və buradakı transformatorlar sistemə qoşulub. Həmçinin, yeni hissədə işlər sürətlə aparılır və burada artıq hər birinin gücü 63 MVt olan 2 transformator quraşdırılıb.

Xatırladaq ki, ümumi enerji sisteminin dayanıqlılığını artırmaq məqsədilə 330 kV-luq IV «Abşeron» hava xətti 500 kV-luq «Abşeron» yarımstansiyasına qoşulacaq və ora da 330 kV-luq «Yaşma» yarımstansiyasına daxil olacaq.