Sənaye və energetika

Ana səhifə

«Darvin Bankəsi» yatağında 10 bloklu platforma istismara verilib

08 oktyabr 2009 09:16 (UTC +04:00)

Bakı. Elnur Hüseynquluyev – APA-Economics. Azərbaycan Dövlət Neft Şirkətinin (ARDNŞ) Dövlət Komissiyası «Darvin Bankəsi» yatağında dənizin 17 metr dərinliyində quraşdırılmış 10 bloklu 660 №-li platformanı istismara verib.

ARDNŞ-dan «APA-Economics»ə verilən məlumata görə, «Darvin Bankəsi» yatağında 12 quyu qazılacaq. «Neft Daşları» Dəniz Qazma İdarəsi tərəfindən quyunun qazılmasına başlanılıb. Xatırladaq ki, «Darvin Bankəsi» yatağı dənizdə Pirallahı adasından 6 km aralıda yerləşir. Bu yatağı ARDNŞ-in ən qocaman idarələrindən olan «Abşeron» NQÇİ istismar edir. İdarənin 100-dən artıq yaşı var. Burada quyular çox da dərin qazılmır. Orta dərinliyi 1500 metrdən çox olmayan quyular sutkada 6-7 ton neft verərək tez bir zamanda çəkilən xərcləri ödəyir. «Darvin Bankəsi» yatağında neftin hasilatı və ötürülməsi üçün bütün infrastruktur yaradılıb. Hazırda yataqda 121 quyu istismar edilir, ümumi sutkalıq neft hasilatı 200 ton təşkil edir. Bu isə NQÇİ-nin gündəlik hasilatının 44%-i deməkdir. Orta hesabla hər quyudan 1,7 ton neft çıxarılır. «Darvin Bankəsi» 1950-ci ildən istismardadır. Ötən dövr ərzində yataqda 651 quyu qazılıb, 16,2 mln. ton neft hasil edilib. Hazırda burada qalıq çıxarılabilən ehtiyatların həcmi 3 mln. tona bərabərdir və buna görə də hər il yataqda yeni platformalar quraşdırılır, köhnə platformalar isə genişləndirilir.

ARDNŞ-dan bildirilib ki, ötən il 340 №-li platformadan 10 quyunun qazılması üçün genişləndirmə işləri aparılıb. Genişləndirilmiş sahədə 8 quyu qazılıb və onların hər biri sutkada 6-7 ton neft verir. Bu il isə 190 №-li platformada quyuların sayının 10-dan 16-ya çatdırılması üçün genişləndirmə işləri aparılıb. Bu ildə «Darvin Bankəsi»ndə ümumilikdə 8 quyunun istismara verilməsi planlaşdırılır. Hazırda daha böyük bir platformada (620 №-li platformada) intensiv inşaat işləri aparılır. Bu platforma 12 blokludur, orta dərinliyi 1300 metr olan 20 quyunun qazılması üçün hesablanıb. Platforma dənizin 15 metr dərinliyində quraşdırılacaq.