Sənaye və energetika

Ana səhifə

Azərbaycan Dövlət Neft Şirkəti neftlə çirklənmiş ərazilərin təmizlənməsi tədbirlərini genişləndirir

12 oktyabr 2009 10:54 (UTC +04:00)

Bakı. Rəşad Süleymanov - APA-Economics. Ötən il Azərbaycan Dövlət Neft Şirkəti (ARDNŞ) tərəfindən neftlə çirklənmiş 200 ha sahədə təmizləmə işləri aparılıb. «APA-Economics»in məlumatına görə, bunu ARDNŞ-in vitse-prezidenti Muxtar Babayev bildirib.

«Ötən il işlər «Bibiheybət» yatağı və «Balaxanı»da aparılıb. ARDNŞ bu il Salyanda, «Balaxanı» və «Ramanı» neft yataqlarında neftlə çirklənmiş ərazilərin təmizlənməsinə başlayıb və işləri davam etdirir», - deyə M.Babayev əlavə edib.

ARDNŞ-in araşdırmalarına görə, Abşeron yarımadasında 10 min hektara yaxın ərazi neft tullantıları ilə müxtəlif dərəcəli çirklənməyə məruz qalıb.

M.Babayev dənizdə istismar müddətini başa vurmuş platformaların sökülməsi istiqamətində işlərə başlandığını da bildirib. Hazırda «SOCAR-ASM» şirkətinin bu işlə məşğul olduğunu deyən M.Babayevin sözlərinə görə, artıq «Bibiheybət» yatağının dəniz hissəsindəki dəmir konstruksiyalar sökülüb. Hazırda «Qum Adası» və «Neft Daşları»nda təmizləmə işləri aparılır.

Sentyabr ayında dəniz platformalarından 3 min tona yaxın dəniz konstruksiyaları sökülərək sahilə gətirilib.

M.Babayevin sözlərinə görə, gələcəkdə bəzi platformalarda dənizdə saxlamaqla açıq muzeyin yaradılması da mümkündür.

ARDNŞ rəsmisi təmsil etdiyi şirkətin bərpa olunan enerjinin istifadəsinə dair xüsusi proqramı olduğunu da vurğulayıb: «Biz artıq belə bir layihəyə başlamışıq. Küləkdən, günəşdən və torpağın temperaturundan istifadə olunacaq. Gələn il Z.Tağıyev adına NQÇİ-də ilk nəticələr olacaq».