Sənaye və energetika

Ana səhifə

Azərbaycan Dövlət Neft Şirkəti yaxın 4 ildə ümumilikdə 6,4 mlrd. dollar sərmayə yatırmaq niyyətindədir

16 oktyabr 2009 07:56 (UTC +04:00)

Bakı. Vahab Rzayev – APA-Economics. «Fitch Ratings» beynəlxalq reytinq agentliyi Azərbaycan Dövlət Neft Şirkətinin (ARDNŞ) uzunmüddətli emitentin defolt reytinqini «BB+», qısamüddətli reytinqini isə «B» səviyyəsində təsdiqləyib. Uzunmüddətli reytinq üzrə proqnoz «stabil» kimi müəyyənləşdirilib.

«APA-Economics»in məlumatına görə, ARDNŞ 100% dövlətə məxsus şirkət olduğuna və ölkə iqtisadiyyatı üçün həyati əhəmiyyət kəsb edən neft-qaz sahəsində dövlətin maraqlarını təmsil etdiyinə (karbohidrogen ehtiyatları Azərbaycanda ÜDM-in 60%-ni təmin edir), həmçinin ölkənin ən böyük vergi ödəyicisi olduğuna görə «Fitch» şirkətlə dövlət arasındakı hüquqi, əməliyyat və strateji əlaqələrin güclü olduğunu vurğulayır. Bu səbəbdən, ARDNŞ-in reytinqləri Azərbaycanın müstəqil reytinqləri («BB+»/«sabit» proqnoz) ilə əlaqəlidir.

Bundan başqa, ARDNŞ-in reytinqləri şirkətin fəaliyyətinin diversifikasiyasını əks etdirir ki, satış əsasən tənzimlənən daxili bazara yönəldilir və bunun nəticəsində şirkət dünya bazarında neft və qaza olan qiymətlərin dəyişkənliyinə daha az məruz qalır. «Fitch» ekspertlərinin fikrincə, ARDNŞ ehtiyatların əvəz olunma göstəriciləri üzrə müqayisə edilən şirkətlər arasında daha yaxşı mövqelərə malikdir.

Təqdim olunan reytinq dərəcələri həmçinin şirkətin hətta müqayisə olunan beynəlxalq şirkətlər arasında müsbət maliyyə göstəricilərini nəzərə alır. Agentlik vurğulayır ki, Türkiyənin «Petkim Petrokimya Holdings AS» («BB-»/«neqativ») neft-kimya istehsalçısının 2 mlrd. ABŞ dollarına alınmasından sonra ARDNŞ-in 2008-ci ildə ümumi leverecinin 0,2x-dən 1,4x-dək artmasına baxmayaraq, ödəniş müddətləri üzrə borcların strukturu tarazlanmış, likvidlik mövqeyi isə adekvat qalır. Qeyd edək ki, «leverec» anlayışı ümumi borcların aktivlərə nisbəti və ya sabit müddətli maliyyə borclarının xalis mənfəətə (həmin borclar ödənilənədək) nisbəti kimi qiymətləndirilir.

Eyni zamanda «Fitch» qeyd edir ki, ARDNŞ 2009-2013-cü illərdə ümumilikdə 6,4 mlrd. dollar dəyərində investisiya proqramını reallaşdırmaqla fəaliyyətin genişləndirilməsi strateqiyasını həyata keçirmək niyyətindədir. «Petkim»in istehsal sahələrində planlaşdırılan və təxminən 4,4 mlrd. dollar vəsait tələb edən neft emalı zavodunun tikintisi ilə yanaşı bu proqramın həyata keçirilməsi iri həcmdə xarici maliyyələşmə tələb edə bilər ki, bu da leverecin kəskin yüksəlməsinə səbəb ola biləcək.