Sənaye və energetika

Ana səhifə

Bu il Azərbaycanda elektrik enerjisinin qeyri-qanuni istifadəsi ilə bağlı 1543 fakt qeydə alınıb

17 oktyabr 2009 08:48 (UTC +04:00)

Bakı. Rəşad Süleymanov – APA. Azərbaycanda elektrik enerjisindən səmərəli istifadə bəzi yerlərdə hələ də lazımi səviyyədə deyil. APA-nın məlumatına görə, bunu Nazirlər Kabinetinin iclasında sənaye və energetika naziri Natiq Əliyev bildirib.

Nazir bildirib ki, cari ilin yanvar-sentyabr aylarında elektrik enerjisinin qeyri-qanuni istifadəsi ilə bağlı 1543 fakt qeydə alınıb.

«Bu gün elektrik stansiyalarında ildə orta hesabla 20,2 mlrd. kVt/saat artıq elektrik enerjisi istehsal olunur. Bu da respublikada elektrik enerjisinə olan tələbatı tam təmin edir», - deyə nazir vurğulayıb.

N.Əliyev bildirib ki, hazırda Asiya İnkişaf Bankı (AİB) ilə Sənaye və Energetika Nazirliyi arasında alternativ enerji mənbələrinin istifadəsi barədə müqavilə çərçivəsində kiçik su elektrik stansiyalarının inşası üçün layihələr hazırlanmaqdadır. AİB layihələrini həyata keçirmək üçün İsveçrənin «N-tech» məsləhətçi şirkəti seçilib və layihələrin texniki-iqtisadi əsaslandırılması hazırlanır: «Hazırda «Kiçik su elektrik stansiyalarına Texniki Yardım» layihəsinin ikinci mərhələsi başa çatmaqdadır və potensial investorlar üçün «soraq kitabı» tərtib olunub. Layihənin həyata keçirilməsi üçün 4 sahə seçilib. Bunlara Şirvan irriqasiya kanalı, Nügədi-Qaraçay, Qusarçay və Katexçay sahələri aiddir. 2009-cu ilin axırında layihənin üçüncü mərhələsi başlanacaq».

Nazir həmçinin əlavə edib ki, Beynəlxalq Ekoenergetika Akademiyası ilə birgə Quba rayonunun Xınalıq kəndində alternativ enerji mənbələrindən istifadə etməklə hibrid, yəni kiçik su elektrostansiyası (1,5MVt), külək stansiyası (0,2 MVt), günəş fotovoltaik qurğusu (0,1 MVt), bioqaz qurğusu (500 kubmetr) sisteminin yaradılması layihəsini hazırlayıb.