Sənaye və energetika

Ana səhifə

Azərbaycanın sənaye kompleksində istehsalın artımı yanvar-sentyabr aylarında 5% olub

20 oktyabr 2009 08:06 (UTC +04:00)

Bakı. Nicat Mustafayev – APA-Economics. Azərbaycan iqtisadiyyatının sənaye kompleksində 2009-cu ilin yanvar-sentyabr ayları ərzində sənaye müəssisələri və fərdi sahibkarlar tərəfindən 15 624,9 mln. manatlıq və ya ötən ilin eyni dövrü ilə müqayisədə 5% çox məhsul istehsal edilib və sənaye xarakterli xidmətlər göstərilib.

Dövlət Statistika Komitəsindən «APA-Economics»ə verilən məlumata görə, hesabat dövründə istehsalın 92,5%-i malların, 7,5%-i isə xidmətlərin payına düşüb, sənaye məhsulunun 20,4%-i dövlət, 79,6%-i isə özəl bölmənin müəssisələrində istehsal edilib. Sənaye məhsulu istehsalının 74,6%-ni həyata keçirən mədənçıxarma bölməsində məhsul buraxılışı və xidmətlərin göstərilməsi 7,8% artıb, 19,9%-lik paya malik olan emal bölməsində 7%, elektrik enerjisi, qaz və suyun istehsalı və bölüşdürülməsi bölməsində isə 8,8% azalma müşahidə olunub.

İstehsal edilmiş sənaye məhsulunun 99,8%-i istehlakçılara göndərilib və 2009-cu il oktyabrın 1-nə sənaye müəssisələrinin anbarlarında 228,2 mln. manatlıq və ya əvvəlki ayla müqayisədə 43,8 mln. manat çox hazır məhsul ehtiyatı olub. Ehtiyatların daha çox hissəsi – 66,9%-i Bakı şəhərinin payına düşüb, qalan hissəsi – 10,1%-i Sumqayıt, 1,7%-i Gəncə, 1,1%-i Şirvan, 1%-i Mingəçevir şəhərlərinin, 2,3%-i Şəki, 2,5%-i Saatlı və s. rayonların sənaye müəssisələrinin anbarlarında qalıb. Sənaye müəssisələrinin anbarlarında öz istehsalı olan məhsullardan əlavə başqa müəssisələrdən alınıb və satış üçün nəzərdə tutulmuş 30,8 mln. manat məbləğində digər mallar da olub.

Qeyd edək ki, sənaye sektorunda fəaliyyət göstərən səhmdar cəmiyyətləri tərəfindən 610,7 mln. manatlıq və ya ümumi buraxılışın 3,9%-i qədər sənaye məhsulu istehsal olunub və xidmətlər göstərilib.