Sənaye və energetika

Ana səhifə

Azərbaycan noyabrda qızıl hasilatını azaldıb

16 dekabr 2010 08:06 (UTC +04:00)

Bakı. Nicat Mustafayev – APA-Economics. Bu ilin noyabr ayı ərzində Azərbaycanda hasil olunan qızılın həcmi oktyabr ayı ilə müqayisədə 2 dəfə azalıb.

Dövlət Statistika Komitəsindən «APA-Economics»ə verilən məlumata görə, noyabr ayında Azərbaycanda 100 kq qızıl çıxarılıb. Noyabrda hasil olunan qızılın həcmi cari ilin yanvar ayı ilə müqayisədə 2,1 dəfə çox olub.

Cari ilin yanvar-noyabr aylarında isə Azərbaycanda hasil olunan qızılın ümumi həcmi 1,7 ton təşkil edib ki, bu da ötən ilin eyni dövrünə nisbətən 8,9 dəfə çoxdur.

Eyni zamanda, hesabat dövründə ölkədə 1 023 kq gümüş istehsal olunub ki, bu da ötən ilin yanvar-noyabr ayları ilə müqayisədə 13,6 dəfə çoxdur.

Ümumiyyətlə, hesabat dövründə Azərbaycanda 2,723 ton qiymətli metal filizləri və kondensantları istehsal olunub. Göründüyü kimi, bunun 1,7 tonu qızıl, 1,023 tonu isə gümüşün payına düşür. Yanvar-noyabr aylarında qiymətli metal filizləri və kondensantları istehsalı ötən ilin eyni dövrünə nisbətən 10,3 dəfə artıb.

Qeyd edək ki, Azərbaycanda qızıl və gümüşün hasilatı Azərbaycan Beynəlxalq Mədən Əməliyyat Şirkəti tərəfindən aparılır. Qızılın hasilatına şirkət 2009-cu ilin may ayında başlayıb. Hazırda Azərbaycanın 200 kq-a yaxın qızıl ehtiyatı mövcuddur ki, ilin sonuna kimi bu göstəricinin artırılacağı gözlənilir.

Xatırladaq ki, qızıl ehtiyatları Azərbaycanda hasil olunan qızılın alınması və onun İsveçrədə emal edilməsindən sonra əldə olunan qızılın hesabına formalaşır. Qızılın 1 unsiyasının qiyməti hazırda dünya bazarlarında 1 386 ABŞ dollarına, gümüşün 1 unsiyası isə 29 dollara bərabərdir.

Onu da qeyd edək ki, qızılın hazırkı qiyməti ilin əvvəli ilə müqayisədə 24% çoxdur.