Sənaye və energetika

Ana səhifə

Natiq Əliyev: “Nabucco” barəsində çox danışılan, amma reallaşması üçün çox az adamın çalışdığı layihədir”

17 dekabr 2010 13:35 (UTC +04:00)

“APA-Economics”in xəbərinə görə, bu barədə Azərbaycanın sənaye və energetika naziri Natiq Əliyev “Uryadoviy Kuryer” qəzetinə müsahibəsində bildirib.

Nazir qeyd edib ki, hazırda Azərbaycan hasil etdiyi 28,5 mlrd. kubmetr qazın 10-11 mlrd. kubmetrini daxili ehtiyaclarına yönəldir, qalanını isə ixrac edir: “Maraqlıdır ki. 3-4 il əvvəl biz Rusiyadan qaz idxal edirdik, indi isə Rusiyaya qaz ixrac edirik. Gələn il Ruiyaya ixrac etdiyimiz qazın həcmi 2 mlrd. kubmetr olacaq və onu 5 mlrd. kubmetrə çatdırmaq barədə də təklif var. Eyni zamanda İran (1 mlrd.), Gürcüstan (1 mlrd.) və Türkiyəyə (6 mlrd.) qaz ixrac edirik. Həmçinin Azərbaycan qazı Yunanıstana təkrar ixrac olunur. Biz Bolqarıstan, Rumıniya, Albaniya və İtaliyaya da qaz ixrac etməyə hazırıq, amma bunun üçün etibarlı və təhlükəsiz nəqliyyat dəhlizləri olmalıdır”.

N.Əliyev “Nabucco”nu “barəsində çox danışılan, amma reallaşması üçün çox az adamın çalışdığı layihə” adlandırıb. Onun fikrincə, bunun səbəbi kəmərin maliyyələşdirmə və uzunmüddətli təchizat məsələlərinin həll olunmamasıdır: “Hər zaman Türkmənistan və İraqın layihədə iştirakı məsələsi qaldırılır. Bu məsələ ətrafındakı geopolitik vurnuxmalar maneçilik törədir. Düşünürəm ki, prosesə siyasətçilər deyil, daha çox texnik və maliyyəçilər cəlb olunsa, işlər sürətlənər”.