Sənaye və energetika

Ana səhifə

Azərbaycanda yenidən qurulmuş Geologiya Muzeyinin açılışı olub

25 dekabr 2010 10:38 (UTC +04:00)

Bakı. Əli Əhmədov – APA-Economics. Bu gün Bakıda müasir tələblər səviyyəsində yenidən qurulmuş Azərbaycan Geologiya Muzeyi işə başlayıb. Yenidənqurma işləri dövlət başçısının sərəncamına əsasən Prezidentin Ehtiyat Fondundan ayrılmış vəsait hesabına aparılıb.

Ekologiya və təbii sərvətlər naziri Hüseyn Bağırov «APA-Economics»ə bildirib ki, muzeydə görülən yenidənqurma işlərində ayrılan vəsaitin 60%-nə qənaət edilib: «Bu işlərə 1 mln. manat vəsait ayrılsa da, işlərə 430 min manata qədər vəsait xərclənib, qalan hissə isə qənaət edilərək yenidən büdcəyə qaytarılıb».

Sahəsi 630 kv. metr olan muzeydə Azərbaycanın yeraltı təbii sərvətləri, mürəkkəb geoloji quruluşunu hərtərəfli səciyyələndirən 5000-dən artıq süxur, filiz, mineral və kristalların seçmə nümunələri toplanıb. Müvafiq avadanlıqlarla təmin olunmuş muzeyə gələnlər buradakı eksponatlar barədə səsli və görüntülü məlumat ala bilərlər.

H.Bağırovun sözlərinə görə, muzeydə inkişaf işləri bundan sonra da davam etdiriləcək. O cümlədən, muzeyi məktəblilər üçün daha maraqlı etmək üçün interaktiv və qonşu elmlərlə – antropologiya, geoloji tarixlə bağlı görüntülü və daha populyar xarakter daşıyan məlumatlar daşıyan yeni ekspozisiyaların qurulması nəzərdə tutulur: «Bunun nəticəsində bura gələnlər ayrı-ayrı süxurlar və faydalı qazıntıların yaranması, kəşfiyyatı, tapılması, istismarı və ondan hansı sahələrdə necə istifadə olunduğu barədə dolğun məlumat ala biləcəklər».

Muzey məktəblilər, tələbələr, elm ictimaiyyəti, eləcə də Azərbaycanın yeraltı təbii sərvətləri ilə tanış olmaq istəyən xarici və yerli investorlar üçün maraqlı olacaq.