Sənaye və energetika

Ana səhifə

ARDNŞ prezidenti Rövnəq Abdullayev: «Qazaxıstan neftinin Bakı-Ceyhan kəmərilə nəqli üçün heç bir problem yoxdur»

27 dekabr 2010 09:43 (UTC +04:00)

Bakı. Əli Əhmədov – APA-Economics. «Bakı-Tiflis-Ceyhan (BTC) boru kəməri hər zaman Qazaxıstan neftini daşımağa hazırdır və kəmərlə Qazaxıstan neftinin daşınmasında heç bir problem yoxdur». «APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) prezidenti Rövnəq Abdullayev Qazaxıstan neftinin BTC ilə nəqli imkanları barədə suala cavab verərkən bildirib.

Onu sözlərinə görə, sadəcə, hazırda Qazaxıstan tərəfi daşımalarda əsasən dəmir yolundan istifadə edərək, nefti əvvəl Batumiyə, buradan isə Qara dənizə çıxarmağa üstünlük verir: «Bunun əsas səbəbi də Qazaxıstan neftinin Rumıniyadakı neftayırma zavodlarına çatdırılmasıdır».

Bununla yanaşı, ARDNŞ başçısı bildirib ki, Qazaxıstan neftinin bu üsulla daşınmasının Azərbaycana ziyanı yoxdur: «Neftin BTC və ya dəmir yolu ilə nəqlindən asılı olmayaraq, hər iki variantda Azərbaycan infrastrukturu istifadə olunur və həm dəmir yolu, həm də boru kəməri əlavə gəlir gətirir».