Sənaye və energetika

Ana səhifə

Azərbaycan Dövlət Neft Şirkətinin prezidenti «Statoil»un vitse-prezidentini qəbul edib

14 yanvar 2011 14:02 (UTC +04:00)

Bakı. Nicat Mustafayev – APA-Economics. Bu gün Azərbaycan Dövlət Neft Şirkətinin (ARDNŞ) prezidenti Rövnəq Abdullayev Norveçin «Statoil» şirkətinin təbii qaz üzrə icraçı vitse-prezidenti Rune Byornsonun rəhbərlik etdiyi nümayəndə heyətini qəbul edib.

ARDNŞ-dan «APA-Economics»ə verilən məlumata görə, görüş zamanı Azərbaycan iqtisadiyyatının, o cümlədən, neft-qaz sənayesinin son illərdə böyük inkişaf yolu keçdiyini deyən ARDNŞ prezidenti əldə edilən nailiyyətlərdə xarici tərəfdaşların, o cümlədən «Statoil» şirkətinin mühüm rol oynadığını qeyd edib. R.Abdullayev «Statoil» ilə istər «Azəri-Çıraq-Günəşli» (AÇG), istərsə də «Şahdəniz» layihələri üzrə səmərəli əməkdaşlıq münasibətlərinin qurulduğunu söyləyib. Bu əməkdaşlığın «Şahdəniz-II» layihəsinə hazırlıq işlərinin sona çatdığı indiki dövrdə xüsusən vacib olduğunu vurğulayan R.Abdullayev həmin layihənin Qərb istiqamətində təbii qaz ixracının artırılması üçün mühüm əhəmiyyət kəsb etdiyini nəzərə çatdırıb. Avropanın enerji təchizatının təmin edilməsi məqsədi ilə Azərbaycanın atdığı addımlardan ətraflı söz açan ARDNŞ prezidenti dünən Bakıda Azərbaycanın dövlət başçısı İlham Əliyevlə Avropa Komissiyasının sədri Joze Manuel Barrozo tərəfindən imzalanan «Cənub qaz dəhlizi haqqında Birgə Bəyannamə»ni bu istiqamətdə növbəti uğur kimi dəyərləndirib. R.Abdullayev Azərbaycan qazının Avropaya nəqli məsələsində ARDNŞ ilə xarici tərəfdaş şirkətlərin mövqeyinin üst-üstə düşdüyünü məmnunluqla qeyd edib.

ARDNŞ ilə «Statoil» arasında etibarlı tərəfdaşlıq münasibətlərinin uğurla inkişaf etdiyini deyən R.Byornson qeyd edib ki, ötən illərdə iki şirkət arasında möhkəm qərarlaşmış yüksək tərəfdaşlıq prinsiplərinə bundan sonra da əməl olunacaq.

Tərəflər «Statoil» şirkətinin iştirakı ilə Azərbaycanda həyata keçirilən neft-qaz layihələrinin gedişini müzakirə edib, Azərbaycan qazının nəqlinin diversifikasiyası məsələləri ətrafında fikir mübadiləsi aparıblar.

Qeyd edək ki, «Statoli» şirkəti AÇG layihəsinin (8,6%), Bakı-Tiflis-Ərzurum kəmərinin (kommersiya operatoru - 25,5%) və «Şahdəniz» layihəsinin (kommersiya operatoru - 25,5%) səhmdarı rolunda çıxış edir.