Sənaye və energetika

Ana səhifə

“Azəriqaz” İstehsalat Birliyi ötən ilin yekunlarına dair hesabatını açıqlayıb

03 fevral 2011 10:18 (UTC +04:00)

Bakı. Əli Əhmədov - APA-Economics. Azərbaycan Dövlət Neft Şirkətinin “Azəriqaz” İstehsalat Birliyində 2010-cu ilin yekunlarına dair mətbuat konfransı keçirilib.

“APA-Economics”in xəbərinə görə, “Azəriqaz” İB-nin baş direktoru Əkbər Hacıyev qurum ARDNŞ-nin tabeçiliyinə verildikdən sonrakı dövrdə görülən genişmiqyaslı işlərdən söz açıb.

Baş direktor bildirib ki, son vaxtlar görülən tədbirlər nəticəsində texnoloji proseslər təkmilləşdirilib, təbii qazın həcminin və təzyiqinin artırılmasına nail olunub, ölkənin qaz təminatı xeyli yaxşılaşdırılıb. Qaz təchizatının yaxşılaşdırılması istiqamətində həyata keçirilən tədbirlər regionlarda xüsusilə sürətlənib. Ümumiyyətlə, regionlar üzrə 3768,8 km tikinti-quraşdırma, 536 km əsaslı təmir işləri yerinə yetirilib, görülən işlər nəticəsində 2010-cu il ərzində 51 kənd və qəsəbə, o cümlədən 73 682 yeni abonent təbii qazla təmin edilib. Həmçinin “Azəriqaz” İB tərəfindən 77 minə yaxın abonentin mənzilində yeni sayğac quraşdırılıb, 81 800 sayğac isə dəyişdirilib ki, bu da yığım faizinin artmasına öz müsbət təsirini göstərib.

“Azəriqaz” İB-nin əsaslı təmir proqramına görə, Bakı şəhərində də işlər uğurla davam etdirilir. 2010-cu ildə paytaxtda 958 km uzunluğunda qaz kəməri təmir edilib və yenidən qurulub.

2010-cu ilin sentyabr-noyabr aylarında Siyəzən Kompressor Stansiyasında (KS) təmir-bərpa işləri aparılıb, stansiya 2011-ci il yanvarın 1-dən fəaliyyətinə bərpa edib. Hazırda bu stansiya Rusiya Federasiyasına gündə 5.5-6 mln. kubmetr təbii qaz nəql edir. Astara KS vasitəsilə İran İslam Respublikasına gündə 1,5 mln. kubmetr təbii qaz ötürülür. İrana nəql olunan təbii qazın miqdarının artması ilə əlaqədar Astara KS-nin yanında yeni Kompressor sexi inşa olunub, yaxın günlərdə istismara veriləcək.

Ə.Hacıyev baş verən bədbəxt hadisələrdən və dəm qazından zəhərlənmələrdən də söhbət açıb. Bildirib ki, 2010-cu il ərzində baş verən bədbəxt hadisələrin 84,1%-i yanma məhsullarının təsirindən zəhərlənmə, 10,6%-i partlayış, 5,4%-i isə yanğınla bağlıdır. Cari ilin yanvar ayında baş verən bədbəxt hadisələrin 71,5%-i zəhərlənmə, 28,6%-i isə partlayışla əlaqədar olub: “Dəm qazının yaranmasının əsas səbəbi hamam otaqlarının tüstü bacalarının olmaması və təhlükəsizlik qaydalarının tələblərinə cavab verməməsidir. Bədbəxt hadisələr baş verən hamam otaqlarının əksəriyyətində tüstü bacaları yoxdur və ya nasazdır. Hamam otaqlarında havadəyişmə (ventilyasiya) kanalları işləmir, otaqların qapıları plastik olaraq kip başlanır və təmiz havanın otağa daxil olmasına imkan vermir. Dəm qazının yaranmasının səbəblərindən biri də hamam otaqlarında təbii qazla işləyən su qızdırıcılarının qeyri-standart olmasıdır”.