Sənaye və energetika

Ana səhifə

Azərbaycanda paralel alternativ enerji sistemi yaradılacaq

16 fevral 2011 14:14 (UTC +04:00)

«APA-Economics»in məlumatına görə, bunu Sənaye və Energetika Nazirliyi Alternativ və Bərpa Olunan Enerji Mənbələri üzrə Dövlət Agentliyinin direktor müavini Cəmil Məlikov Avropa İttifaqı ilə Azərbaycan arasında Enerji sahəsində Anlaşma Memorandumunun icrasına dair bu gün Bakıda keçirilən görüşdə bildirib.

C.Məlikovun sözlərinə görə, bu addımlara Agentliyin potensialının artırılması və bu sahəyə güzəştlərin tətbiqi daxildir: «Artıq bu məsələlərlə bağlı dövlət başçısının müvafiq sərəncamının layihəsi hazırlanıb. Onun yaxın vaxtlarda imzalanacağı gözlənilir». Burada agentliyin yeni ştat cədvəli və strukturunun təsdiqlənməsi (işçilərin sayının artırılması), bu sahədə inkişafı təmin etmək üçün güzəştlər və stimullaşdırıcı addımların siyahısı və həyata keçirilməsi müddətləri nəzərdə tutulub.

Bundan başqa, alternativ enerji istehsal edən qurğuların qurulması və onlardan enerjinin alınması üçün ölkədə xüsusi poliqon yaradılacaq. Burada həm qurğular qurulacaq və sınaqdan keçiriləcək, həm də enerjinin paylanması və istehlakçılara çatdırılması və istifadəsi sistemi qurulacaq, dispetçer məntəqəsi yaradılacaq: «Bu sistem Azərbaycanın ənənəvi enerji şəbəkəsi ilə paralel işləyəcək».

C.Məlikov bildirib ki, Agentlik yaradılarkən ona dövlət büdcəsindən ayrılmış 40 mln. manatın 25 mln. manatı artıq istifadə olunub. Bu il isə qurum 15 mln. manat vəsaitlə fəaliyyət göstərəcək. Bununla yanaşı, agentlik pilot layihələrini həyata keçirmək üçün əlavə məbləğin ayrılması üçün hökumətə müraciət edib.

Görüşdə C.Məlikov Avropa İttifaqını bu sahəyə dəstək verməyə, o cümlədən Azərbaycanda bərpa olunan enerji qurğularının istehsalının təşkilini təklif edib. SEN-in neft-qaz şöbəsinin müdiri İdris Rzabəyov alternativ enerji sektorunun inkişafı, bura özəl sektorun cəlb olunması üçün bu sahə ilə bağlı normativ-hüquqi baza və tarif siyasətinin hazırlanmasını vacib sayıb. Şöbə müdiri bu məsələlərdə Avropa İttifaqının dəstəyinin mühüm olduğunu bildirib. Öz növbəsində Aİ nümayəndələri Azərbaycanda alternativ enerji sektoruna dəstək verməyə hazır olduqlarını bildiriblər.