Sənaye və energetika

Ana səhifə

ARDNŞ prezidenti Londonda BP və “ExxonMobil” şirkətlərinin rəhbirliyi ilə görüşüb

23 fevral 2011 16:21 (UTC +04:00)

ARDNŞ-dən «APA-Economics»ə verilən məlumata görə, BP-Azərbaycan şirkətinin prezidenti Rəşid Cavanşir və BP-nin yüksək rütbəli digər şəxslərinin də iştirak etdiyi görüşdə BP şirkətinin ARDNŞ ilə “Azəri-Çıraq-Günəşli”, “Şahdəniz” yataqlarının işlənilməsi, Bakı-Tbilisi-Ceyhan əsas ixrac neft kəmətinin inşası və istismarı layihələrinin həyata keçirilməsində uzun müddətdən bəri davam edən səmərəli əməkdaşlıq barədə ətraflı müzakirələr aparılıb, eləcə də “Şəfəq-Asiman” yatağı üzrə görülən işlər barədə danışılıb.

Tərəflər əməkdaşlığın yüksək səviyyədə olduğunu, Azərbaycan iqtisadiyyatının və xüsusilə neft-qaz sənayesinin inkişafına böyük töhfələr verdiyini qeyd ediblər. Görüş zamanı “Şahdəniz” yatağının işlənilməsi layihəsinin 2-ci fazası çərçivəsində gözlənilən perspektivlər, Azərbaycan qazının Avropaya nəqli, habelə Azərbaycanda və üçüncü ölkələrdə həyata keçirilən layihələrdə ARDNŞ ilə BP arasında əməkdaşlıq məsələləri müzakirə edilib.

Həmin gün ARDNŞ prezidenti Rövnəq Abdullayev “ExxonMobil” şirkətinin Avropa və Xəzər regionu üzrə regional meneceri Filipp Malholl və şirkətin beynəlxalq məsələlər üzrə baş məsləhətçisi Stiven Mənn ilə də görüşüb. Əvvəl tutduğu vəzifələrlə əlaqədar Azərbaycanla və regionla yaxından tanış olduğunu vurğulayan Stiven Mənn yeni vəzifədə də Azərbaycanla əlaqələrin inkişafına çalışacağını bildirib və ümid etdiyni deyib ki, qarşıdakı dövrdə “ExxonMobil” və ARDNŞ arasında əməkdaşlıq yeni mərhələyə qədəm qoyacaq. “ExxonMobil”in Azərbaycanda fəaliyyətə başlayan ilk beynəlxalq neft-qaz şirkətlərindən biri olduğunu və regional əhəmiyyətli irimiqyaslı layihələr çərçivəsində ARDNŞ ilə uğurlu əməkdaşlıq münasibətləri qurduğunu deyən Rövnəq Abdullayev qeyd edib ki, “ExxonMobil” şirkəti ilə tərəfdaşlığın daha da inkişaf etdirilməsi üçün güclü zəmin yaranıb. ARDNŞ prezidenti iki şirkət arasında formalaşmış işgüzar münasibətlərin bundan sonra da uğurla davam etdiriləcəyinə əmin olduğunu bildirib.