Sənaye və energetika

Ana səhifə

Azərbaycanda Metanol Zavodunun inşası başa çatır

02 mart 2011 07:59 (UTC +04:00)

Bakı. Nicat Mustafayev – APA-EConomics. Azərbaycanda Metanol Zavodunun tikintisi layihəsi artıq başa çatmaq üzrədir. «APA-Economics»in məlumatına görə, bunu «Azerbaijan Metanol Company»nin (AzMeCo) İdarə Heyətinin sədri Nizami Piriyev bildirib.

«Bu ilin sonunadək zavodu istifadəyə vermək niyyətindəyik. Zavod artıq inşa olunub, hazırda son tamamlama işləri aparılır. Bu layihənin davamını, yəni ikinci mərhələsini də yerinə yetirmək niyyətindəyik. Belə ki, metanol istehsalı prosesində hidrogen yaranır, bu isə öz növbəsində ammonyak və karbomid (gübrə) istehsalı üçün istifadə olunur. İkinci mərhələdə ildə 300 min ton karbomid istehsalı nəzərdə tutulur ki, bunun üçün 300-320 mln. dollar investisiya tələb olunur. Bu isə ayrıca gübrə zavodunun inşası üçün tələb olunan vəsait həcmindən azdır. Belə ki, müstəqil gübrə zavodunun inşasına 450 mln. dollar lazımdır», - deyə N.Piriyev bildirib.

Şirkət rəhbəri qeyd edib ki, Metanol Zavodunun inşasında Avropa Yenidənqurma və İnkişaf Bankının (AYİB) kreditindən istifadə olunub: «İkinci mərhələdə də kreditlərdən istifadə etmək niyyətindəyik. Metanol layihəsinin dəyəri 320 mln. dollar, ikinci fazanın - 300 mln. dollar, ümumi dəyər isə 600-620 mln. dollar təşkil edir».

N.Piriyev hesab edir ki, metanol – gələcəyin yanacağıdır: «Hazırda dünyada bu məhsula tələbat artmaqdadır. Belə ki, yeni texnologiyalar metanol əsasında işləyir».

Şirkət başçısı qeyd edib ki, «Mitsubishi» və «Mitsui» kimi şirkətlər metanolun alınmasında maraqlıdır. «Təkcə Türkiyənin metanola olan tələbatı ildə 400 min tondur. Biz isə ilkin olaraq ildə 560 min ton, sonradan isə 720 min ton istehsal edəcəyik. İstehsal olunan məhsulun 90%-i ixrac olunacaq. Ümid edirəm ki, gələcəkdə Azərbaycanda da bu məhsuldan geniş istifadə ediləcək», - deyə N.Piriyev bildirib.