Sənaye və energetika

Bu ilin sonunadək Gürcüstandakı SOCAR yanacaqdoldurma məntəqələrinin sayı 100-ə çatdırılacaq

21 iyun 2011 15:19 (UTC +04:00)

Bakı. Nicat Mustafayev - APA-Economics. Bu ilin sonunadək “SOCAR Georgia Petroleum” MMC tərəfindən Gürcüstanda tikilib istifadəyə verilmiş yanacaqdoldurma məntəqələrinin sayı 100-ə çatdırılacaq.

Azərbaycan Dövlət Neft Şirkətindən (ARDNŞ) «APA-Economics»ə verilən məlumata görə, bu günədək «SOCAR Georgia Petroleum» tərəfindən Gürcüstanda tikilib istifadəyə verilmiş yanacaqdoldurma məntəqələrinin sayı 72-dir: «Onların sayının cari ilin sonuna 100-ə çatdırılması nəzərdə tutulur. Hazırda «SOCAR Georgia Petroleum» MMC-nin yanacaqdoldurma məntəqələrində ümumilikdə 1 142 nəfər işçi çalışır ki, tikintisi davam etdirilən 28 yanacaqdoldurma məntəqəsi ilin sonunadək istifadəyə veriləndən sonra əməkdaşların sayı 1 582 nəfərə çatdırılacaq».

Qeyd edək ki, 2006-cı ildən fəaliyyət göstərən «SOCAR Georgia Petroleum» MMC ARDNŞ-ın «SOCAR Energy Georgia» şirkətinin 100%-li törəmə müəssisəsidir. Müəssisə Gürcüstan bazarına neft məhsullarının (benzin, dizel, aviasiya yanacağı, sıxılmış qaz, bitum, mazut) idxalı, həmçinin neft məhsullarının topdan və pərakəndə satışı, SOCAR brendi altında müasir standartlara cavab verən yanacaqdoldurma məntəqələrinin və neft bazalarının tikintisi ilə məşğuldur.