Sənaye və energetika

Ana səhifə

Baş nazir Artur Rasi-zadə yenidən ARDNF Müşahidə Şurasının sədri seçilib

30 iyun 2011 15:28 (UTC +04:00)

Bakı. Əli Əhmədov - APA-Economics. 2011-ci il iyunun 30-da Azərbaycan Dövlət Neft Fondunun (ARDNF) Müşahidə Şurasının növbəti iclası keçirilib.

Fonddan «APA-Economics»ə verilən məlumata görə, baş nazir, ARDNF-nin Müşahidə Şurasının sədri Artur Rasi-zadənin sədrliyi ilə keçirilən iclasda Fondun 2010-cu ildə fəaliyyəti haqqında illik hesabatı, maliyyə fəaliyyətinin auditinin nəticələri, ARDNF-nin 2010-cu il büdcəsinin icrası, Fondun 2011-ci il büdcəsində əlavə və dəyişikliklərin edilməsi məsələlərinə baxılıb.

Müşahidə Şurası Neft Fondunun icraçı direktorunun təqdim etdiyi Fondun 2010-cu ildə fəaliyyəti haqqında illik hesabatına, Fondun 2010-cu ildə maliyyə fəaliyyəti haqqında müstəqil auditorun (“Ernst and Young” şirkətinin) hesabatına baxaraq onları məqbul hesab edib. Fondun 2010-cu il büdcəsinin icrası layihəsinin təsdiq olunmaq üçün Azərbaycan prezidentinə təqdim etmək barədə qərar qəbul edilib.

Müşahidə Şurası Fondun 2011-ci il büdcəsinə dəyişiklikləri də məqbul hesab edərək və həmin dəyişikliklərin təsdiq olunmaq üçün Azərbaycan prezidentinə təqdim olunmasını qərara alıb. Baş nazir A.Rasi-zadə 2011-ci il üzrə ARDNF Müşahidə Şurasının sədri seçilib.