Sənaye və energetika

Ana səhifə

Nobel Fondunda ARDNŞ prezidenti ilə görüş keçirilib - FOTO

Nobel Fondunda ARDNŞ prezidenti ilə görüş keçirilib - <font color=red>FOTO</font>

01 iyul 2011 14:22 (UTC +04:00)

Bakı. Vahab Rzayev - APA-Economics. Bu gün İsveçin paytaxtı Stokholm şəhərində yerləşən Nobel Fondunda Azərbaycan Dövlət Neft Şirkətinin (ARDNŞ) prezidenti Rövnəq Abdullayevlə görüş keçirilib.

Şirkətdən “APA-Economics”ə verilən məlumata görə, R.Abdullayev və ARDNŞ-in onunla İsveçdə səfərdə olan nümayəndə heyəti ilə görüşən Nobel Fondunun prezidenti Lars Heykensen dünya neft sənayesində böyük xidmətləri olmuş Nobellər ailəsinin Azərbaycanla sıx bağlı olduğunu söyləyib və bu bağlılığın dünya neft işi tarixində bir çox yeniliklərin yaranması ilə nəticələndiyini qeyd edib.

R.Abdullayev Azərbaycan neft sənayesinin tarixi, xüsusilə XX əsrin 90-cı illərindən ölkəmizdə həyata keçirilən regional əhəmiyyətli irimiqyaslı neft-qaz layihələri haqqında görüş iştirakçılarına ətraflı məlumat verib. O bildirib ki, Nobel qardaşlarının 132 il öncə Bakıda həyata keçirdikləri fəaliyyət haqqında bədii, rəqəmsal və foto-sənədli sərginin bu gün onların vətənində, Nobelin adını daşıyan Fondda nümayiş etdirilməsi əlamətdar hadisədir.

R.Abdullayev qeyd edib ki, həmin sərgi iki il ərzində dünyanın bir çox ölkələrində müvəffəqiyyətlə təqdim olunub.

Qeyd edilib ki, ilk dəfə 2009-cu ildə Bakıda nümayiş etdirilmiş sərgi “Əsrin müqaviləsi”nin imzalanmasının 15, “Branobel” Səhmdar Cəmiyyətinin yaradılmasının 130 illik yubileylərinə həsr olunub. Sərgi ARDNŞ, “Statoil Hydro” şirkətləri və Azərbaycan Mədəniyyət və Turizm Nazirliyinin əməkdaşlığı ilə hazırlanıb. Daha sonra Azərbaycan nümayəndə heyəti tərəfindən Nobellərin Azərbaycandakı fəaliyyətindən bəhs edən “Nobellər və Bakı nefti” layihəsinin təqdimatı keçirilib.

Görüşdə Stokholmdakı “Nobellər ailəsi” Cəmiyyətinin sədri Tomas Tiden, Azərbaycanın İsveçdəki səfiri Rafael Qurbanov iştirak ediblər.

R.Abdullayevin Stokholmdakı Nobel Muzeyinin direktoru Ulav Amelin ilə də görüşəcəyi gözlənilir.