Sənaye və energetika

Ana səhifə

Bakıda bərpa olunan enerji mənbələri ilə bağlı dəyirmi masa keçirilib - FOTO

Bakıda bərpa olunan enerji mənbələri ilə bağlı dəyirmi masa keçirilib - <font color=red>FOTO</font>

08 iyul 2011 09:28 (UTC +04:00)

Bakı. Vahab Rzayev – APA-Economics. Bu gün Bakıda Azərbaycan prezidenti yanında Strateji Araşdırmalar Mərkəzi və Qara Dəniz Beynəlxalq Araşdırmalar Mərkəzinin birgə təşkilatçılığı ilə «İqlim dəyişikliyi və Geniş Qara Dəniz regionunda bərpa olunan enerji mənbələri» adlı dəyirmi masa keçirilib. «APA-Economics»in məlumatına görə, tədbirdə iqlim dəyişikliyi, bərpa olunan enerji mənbələrinin istifadəsi, bununla bağlı olan problem və perspektivlər kimi mövzular ətrafında müzakirələr aparılıb.

Tədbirdə çıxış edən Strateji Araşdırmalar Mərkəzinin direktor müavini Gülşən Paşayeva bərpa olunan enerji mənbələrindən istifadənin çox vacib mövzu olduğunu bildirərək iqlim dəyişikliyinə mənfi təsir edən amillərin aradan qaldırılmasında enerji sahəsi, sənayenin təmiz və müasir prinsipləri ilə aparılması ilə yanaşı alternativ mənbələrin inkişafı, yaşıllaşdırma prosesinin sürətləndirilməsi, istehsalatda optimallaşmanın aparılmasının vacibliyini qeyd edib.

Ekologiya və təbii sərvətlər naziri Hüseyn Bağırov öz çıxışında Azərbaycanda bərpa olunan enerji sahəsinin inkişafı perspektivləri və mövcud vəziyyət barədə danışıb. Nazir bildirib ki, Azərbaycanda hazırda yalnız külək enerjisinin potensialı təxminən 2-2,5 min MVt təşkil edir ki, bu da ənənəvi enerji mənbələrinin külli miqdarda qənaətinə imkan yarada bilər. Bundan başqa, enerji istehsalında alternativ kimi günəş enerjisi, termal enerji, bioqaz kimi mənbələrin potensialı da genişdir. H.Bağırov bildirib ki, hazırda Azərbaycanda ölkə başçısının bu sahə üzrə konsepsiyası əsasında işlər aparılır ki, həmin konsepsiya bərpa olunan enerji mənbələrindən geniş istifadəni nəzərdə tutur.

Tədbirdə bildirilib ki, alternativ enerji sahəsi bahalı olduğuna görə, bununla bağlı layihələrin icrasına az sayda ölkələr real maraq göstərir. Azərbaycan isə öz növbəsində alternativ enerji sənayesini inkişaf etdirməklə qənaət etdiyi hazırkı enerji dayıcılarının (neft, qaz və s.) ixracını artırmaq və əlavə gəirlər əldə etmək niyyətindədir. Bu da alternativ enerji istehsalı layihələrinin rentaelliyini artıracaq və çəkilən məsrəfləri daha qısa zaman ərzində ödənilməsinə şərait yaradacaq.

Toplantıda çıxış edən Alternativ və bərpa olunan enerji mənbələri üzrə Dövlət Agentliyinin direktoru Akim Bədəlov bu sahədə bir sıra problemlərin olduğunu da qeyd edib. Bunların arasında əsası bərpa olunan enerji sənayesinin kapital tutumlu olması və bu məsələnin dünya miqyasında siyasiləşməsidir.

A.Bədəlovun sözlərinə görə, alternativ enerjinin baha olması amili dünyada siyasi və iri biznes dairələrinin oyun predmetinə çevrilir. Nəticədə, bu sahədə maraqların toqquşması baş verir ki, bu da həmin sahənin inkişafına mane olan əsas amillərdən biridir. Azərbaycana gəldikdə A.Bədəlov bildirib ki, ölkədə alternativ enerji sənayesinin inkişafı ilk növbədə ənənəvi enerji mənbələrinin tükənməsi baxımından aparılmalıdır.

Dəyirmi masada həmçinin Yunanıstanın Azərbaycandakı səfiri İoannis Metaksas və Qara Dəniz Beynəlxalq Araşdırmalar Mərkəzinin baş direktoru Zefi Dimadama çıxış ediblər və alternativ enerji sahəsində problem və perspektivlər barədə danışıblar.