Sənaye və energetika

Ana səhifə

“Xəzər təbii qazı: cari tendensiyalar və gələcək ssenarilər” mövzusunda konfrans keçirilir

15 iyul 2011 08:50 (UTC +04:00)

APA-nın xəbərinə görə, konfrans Dövlət Neft Şirkətinin dəstəyi ilə Azərbaycan Diplomatik Akademiyasının Yaya Enerji Məktəbi çərçivəsində təşkil olunub.

ADA-nın rektoru Hafiz Paşayev Yay Enerji Məktəbində 17 ölkədən 41 nümayəndənin iştirak etdiyini açıqlayıb. O, ARDNŞ-in sponsorluğu ilə bu ilin sentyabrında ADA-da Enerji və ətraf mühit mərkəzini açılmasının planlaşdırıldığını deyib.

ARDNŞ prezidenti Rövnəq Abdullayev çıxışında bildirib ki, Azərbaycan enerji təhlükəsizliyinin təminatı yönündə fəaliyyətini davam etdirir, dünya bazarına mərhələli inteqrasiya siyasəti yeridərək öz ixracatını diversifikasiya edir. O, 2004-cü ildən 2010-cu ilə qədər Azərbaycanda təbii qaz hasilatının 5 milyarddan 26 milyard kubmetrə qədər artdığını nəzərə çatdırıb. R. Abdullayev “Şahdəniz” yatağının istismarının ilk fazasının 2006-cı ildə başladığını xatırladaraq hazırda bu yataqdan 23 milyon kubmetr qaz və 5 min ton kondensat çıxarıldığını söyləyib: “İndi “Şahdəniz”in ikinci mərhələsinə hazırlıq gedir. Bu mərhələdə ildə azı 16 milyard kubmetr qaz hasil ediləcək. “Şahdəniz-2”dən ilk qazın 2017-ci ildə hasil ediləcəyi gözlənilir”.

R. Abdullayev hazırda ARDNŞ-in təkbaşına “Ümid” yatağının işlənməsini həyata keçirdiyini vurğulayaraq bu yatağın 200 milyard kubmetr qaz və 40 milyon ton kondensat ehtiyatına malik olduğunu açıqlayıb. O, Azərbaycanda 40-a yaxın təbii qaz strukturunun olduğunu və 2015-ci ildən etibarən il ərzində 30 milyard kubmetr qaz çıxarılacağını bəyan edib. ARDNŞ rəhbəri hazırda AGRİ, İTGİ və “Nabucco” layihələrində iştirakın nəzərdən keçirildiyini də xatırladıb.

qaz_neft