Sənaye və energetika

Ana səhifə

DEPA şirkəti: İTGİ layihəsi Azərbaycan qazının Avropaya nəqli üçün ən yaxşı marşrutdur

15 iyul 2011 14:14 (UTC +04:00)

Bakı. Əli Əhmədov - APA-Economics. Azərbaycan qazının Avropaya nəqli üçün ən sərfəli və strateji cəhətdən Azərbaycanın maraqlarına cavab verən marşrut Yunanıstandan keçməklə İtaliyaya uzanan İTGİ (İnterkonnekt Türkiyə-Yunanıstan-İtaliya) layihəsidir. “APA-Economics”in məlumatına görə, bu barədə Yunanıstanın DEPA şirkətinin icraçı direktoru Harri Saşinis bu gün keçirdiyi mətbuat konfransında bildirib.

Onun dediyinə görə, İTGİ Azərbaycanın strateji maraqlarına cavab verir və faktiki olaraq istismara hazırdır: “Cüzi tədbirlər görməklə layihənin gücünü ildə 24 mlrd. kubmetrə çatdırmaq mümkündür. Yunanıstanla İtaliya arasındakı kəmərin buraxılış gücünü əlavə xərclər tələb olunmadan 12 mlrd. kubmetrdən 16 mlrd. kubmetrə çatdırmaq olar. Paralel olaraq Yunanıstanı Bolqarıstanla birləşdirən qaz kəmərinin gücünü də 3 mlrd. kubmetrdən 5 mlrd. kubmetrə çatdırmaq mümkündür. Biz bu işləri 2014-cü ilədək başa çatdıra bilərik. Yəni “Şahdəniz” layihəsinin ikinci mərhələsi başlananda bu qazı tam şəkildə Avropaya nəql edə biləcək kəmər mövcud olacaq”.

İTGİ-nin «Şahdəniz»in bütün qazını nəql edə biləcəyini deyən H.Saşinisin sözlərinə görə, qazın nəqli üçün başqa kəmərlər, o cümlədən “Nabucco” o zaman çəkilməlidir ki, Xəzər qazına başqa mənbələr, məsələn, Türkmənistan və ya İraq qazı da əlavə olunsun: «İTGİ təhlükəsizlik baxımından da qazın nəqli üçün ən etibarlı kəmərdir».

H.Saşinis bildirib ki, adı çəkilən kəmər həm mövcud olan, həm də gələcəkdə yaradılan qaz sistemləri ilə asanlıqla birləşə bilər, ona görə də onun vasitəsilə qazı istənilən ölkəyə nəql etmək mümkündür: «Qazın bu kəmərlə nəqli Azərbaycanı Avropa qaz bazarının vacib oyunçusuna çevirə bilər».