Sənaye və energetika

Ana səhifə

DEPA-nın səhmlərinin satışında ARDNŞ-a əlavə güzəşt nəzərdə tutulmur

15 iyul 2011 15:07 (UTC +04:00)

Bakı. Əli Əhmədov - APA-Economics. Özəlləşdirmə zamanı DEPA şirkətinin səhmlərinin minimum 55%, maksimum 90%-i satışa çıxarılacaq.

«APA-Economics»in məlumatına görə, bu barədə Yunanıstanın DEPA şirkətinin icraçı direktoru Harri Saşinis bu gün Bakıda keçirdiyi mətbuat konfransında bildirib.

Onu sözlərinə görə, hazırda şirkətin səhmlərinin 65%-i Yunanıstan hökumətinə, 35%-i isə «Helenik Petroleum» şirkətinə məxsusdur: «Hökumət özündə şirkətin səhmlərinin 10%-ni saxlamaq niyyətindədir. «Helenik Petroleum»a məxsus olan səhmlərin isə satılacağı barədə nəsə demək çətindir. Ola bilsin, onlar da öz paylarının müəyyən hissəsini satışa çıxarsınlar».

İcraçı direktorun sözlərinə görə, hazırda DEPA-nın səhmlərinə bir neçə şirkət maraq göstərir: «Satış zamanı ən yüksək qiymət təklif edən şirkətə üstünlük veriləcək». Qeyd edək ki, satış barədə informasiyanın sentyabradək mediaya açıqlanması gözlənilir.

H.Saşinis bildirib ki, Azərbaycan öz qazını Avropaya nəql etmək üçün DEPA-nın təklif etdiyi İTGİ layihəsini seçəcəyi təqdirdə belə, şirkətin səhmlərinin satışında ARDNŞ-a əlavə güzəşt nəzərdə tutulmur: “Satış prosesi çox şəffaf olacaq və ən yüksək qiyməti söyləyən şirkət qalib gələcək”.

Eyni zamanda şirkət nümayəndəsi inandığını bildirib ki, qazın ixrac marşrutlarının seçilməsi də Azərbaycanın strateji maraqlarına və «Şahdəniz»in tələblərinə uyğun olaraq şəffaf keçiriləcək.