Sənaye və energetika

Ana səhifə

Moldova AGRI layihəsinə strateji maraq göstərir

23 sentyabr 2011 14:25 (UTC +04:00)

Bakı. Viktoriya Dementyeva - APA-Economics. Moldova Azərbaycan qazının Gürcüstan vasitəsilə Rumıniyaya nəqlini nəzərdə tutan AGRI (Azerbaijan-Georgia-Romania Interconnector) layihəsinin reallaşmasına strateji maraq göstərir. “APA-Economics”in xəbərinə görə, bu barədə Rumıniya KİV-nə müsahibəsində ölkənin baş naziri Vlad Filat bildirib.

Onun sözlərinə görə, Moldova hökuməti layihəyə qoşulmaq imkanlarını öyrənir. Bu məsələyə bir sıra rəsmi görüşlərdə, o cümlədə V.Filatın Rumıniya prezidenti Trayan Basesku ilə sentyabrın 22-də keçirilən görüşündə toxunulub. Baş nazir qeyd edib ki, təbii qazın və ya enerjidaşıyıcılarının bir mənbəyindən asılı olmaq ölkənin enerji təhlükəsizliyinin zəifləməsinə gətirib çıxarır.

Xatırladaq ki, ötən il aprelin 13-də Buxarestdə Rumıniya, Azərbaycan və Gürcüstan arasında AGRİ layihəsinin reallaşması ilə bağlı anlaşma memorandumu imzalanıb. Sentyabrın 14-də isə Azərbaycan, Gürcüstan, Macarıstan və Rumıniya AGRI layihəsi üzrə Bakı Bəyannaməsini imzalayıb. Layihə Azərbaycanın təbii qazının boru xətləri vasitəsilə Gürcüstanın Qara dəniz sahillərinə nəql olunması, burada xüsusi terminalda mayeləşdirilərək, Qara dəniz vasitəsilə tankerlə Rumıniyanın Konstansa limanındakı terminala çatdırılması, daha sonra isə yenidən təbii qaz şəklində bu ölkənin ərazisində mövcud olan qaz infrastrukturu şəbəkəsi vasitəsilə Rumıniyanın və digər Avropa ölkələrinin tələbatlarının ödənilməsini nəzərdə tutur.

İlkin hesablamalara görə, AGRI layihəsinin icrasına 1,2-4,5 mlrd. avro tələb olunacaq. Vəsaitin dəqiq həcmi isə tikiləcək terminalların illik gücündən (2-8 mlrd. kubmetr) asılı olacaq. Layihənin təxminən 2 il ərzində reallaşması nəzərdə tutulur. İlkin mərhələdə AGRI vasitəsilə ildə 8 mlrd. kubmetr, gələcəkdə isə 20 mlrd. kubmetr qazın nəqli planlaşdırılır.