Sənaye və energetika

Ana səhifə

Rusiya və Ukrayna prezidentləri qaz mübahisəsində əhəmiyyətli irəliləyişə nail olublar

26 sentyabr 2011 09:40 (UTC +04:00)

Bakı - APA-Economics. Rusiya və Ukrayna arasında aylardır davam edən qaz mübahisəsində əhəmiyyətli irəliləyiş əldə olunub. “APA-Economics”in “RİA Novosti”yə istinadən məlumatına görə, bu bəyanatla Rusiya prezidentinin mətbuat katibi Natalya Timakova çıxış edib.

Ukrayna prezidenti Viktor Yanukoviçin sentyabrın 24-də Moskvada Rusiya prezidenti Dmitri Medvedev və baş nazir Vladimir Putinlə görüşləri haqda açıqlama verən N.Timakova bildirib ki, Rusiya qazının Ukrayna ərazisi ilə tranzitinə dair əldə olunan irəliləyiş gələcəkdə hər iki tərəfi qane edən müvafiq sazişlərin imzalanacağını düşünməyə əsas verir.

Ukrayna prezidentinin mətbuat xidmətinin yaydığı açıqlamada da danışıqlarda əhəmiyyətli irəliləyişə nail olunduğu vurğulanır: “Bu irəliləyiş isə yaxın vaxtlarda hər iki ölkəni qane edən konkret nəticələrin əldə olunacağına ümid etməyə əsas verir”.

Bundan başqa, danışıqlar zamanı oktyabr ayında Kiyevdə Ukrayna-Rusiya hökumətlərarası komissiyasının növbəti iclasının keçirilməsi barədə də razılığa gəlinib.

Qeyd edək ki, Rusiya və Ukrayna arasındakı qaz mübahisəsinin səbəbi Kiyevin Moskvadan aldığı qazın həcmini 1/3 həcmdə - 40 mlrd. kubmetrdən 27 mlrd. kubmetrə qədər azaltmaq niyyətidir. “Qazprom” şirkəti isə hesab edir ki, hazırda qüvvədə olan müqavilələr Ukraynanın üzərinə aldığı qazın həcmindən asılı olmayaraq, ildə ən azı 33 mlrd. kubmetr qazın dəyərini ödəmək öhdəliyi qoyur.