Bakı. Əli Əhmədov – APA-Economics. Azərbaycan qazının Avropa bazarlarına nəqli üçün çəkiləcək Trans-Anadolu boru kəmərinin (TANAP) ilkin ötürücülük qabiliyyəti ildə 16 mlrd. kubmetr olacaq. «APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) iqtisadi məsələlər üzrə vitse-prezidenti Süleyman Qasımov bildirib.
Onun sözlərinə görə, 2023-cü ildə TANAP kəmərinin buraxılış gücünün ildə 23 mlrd. kubmetrə, 2026-cı ildə isə 31 mlrd. kubmetrə çatdırılması nəzərdə tutulur. İlk dövrdə kəmərlə nəql olunacaq 16 mlrd. kubmetr Azərbaycan qazının 10 mlrd. kubmetrinin Avropaya, 6 mlrd. kubmetrinin isə Türkiyəyə çatdırılması planlaşdırılır. Avropa üçün nəzərdə tutulan qaz Türkiyə-Bolqarıstan və ya Türkiyə-Yunanıstan sərhədində təhvil veriləcək.
S.Qasımov bildirib ki, BP, «Statoil» və «Total» şirkətləri TANAP layihəsinə qoşulmaq istədiklərini bildirib: «Hazırda bu istiqamətdə danışıqlar davam etdirilir».
Qeyd edək ki, Azərbaycanda hasil edilən qazın Türkiyə ərazisi ilə Avropaya nəql edilməsinə dair 2012-ci il iyunun 26-da İstanbulda Azərbaycan prezidenti İlham Əliyev və Türkiyənin baş naziri Rəcəb Tayyib Ərdoğan tərəfindən Trans-Anadolu Boru Kəməri (TANAP) üzrə hökumətlərarası müqavilə imzalanıb. Uzunluğu 2 000 km olacaq TANAP kəmərinin inşası layihəsinin iştirakçıları ARDNŞ, «BOTAŞ» və TPAO şirkətləridir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
