Bakı. Nicat Mustafayev – APA-Economics. Son 9 ildə Azərbaycanda qeyri-neft sənayesində əlavə dəyər istehsalı 1,8 dəfə artıb. «APA-Economics»in məlumatına görə, bunu «İnterkabel» Beynəlxalq Assosiasiyasının Bakıda keçirilən 45-ci iclasında Azərbaycanın iqtisadi inkişaf nazirinin müavini Niyazi Səfərov bildirib.
Onun sözlərinə görə, sözü gedən müddət ərzində ölkədə məhsul istehsalı metallurgiya sənayesində 2,2 dəfə, metal məmulatlarının istehsalı sahəsində 4 dəfə, maşın və avadanlıqlar istehsalında 2,4 dəfə, rezin və plastmas məmulatları – 3,1 dəfə, tikinti materialları – 2,1 dəfə artıb. Hazırda Azərbaycanın qara, əlvan və nadir metal filizləri ilə zəngin olması metallurgiyanın, hazır metal məmulatları, maşınqayırma və digər əlaqəli sahələrin inkişafına imkan verir. Bu baxımdan Gəncə şəhərində yaxın 3 il ərzində (2013-2015-ci illərdə) dəmirin birbaşa reduksiyası, poladəritmə və pellet zavodlarından ibarət metallurgiya kompleksinin inşasının ölkədə metallurgiyanın inkişafı və 3 800 yeni iş yerinin yaradılması baxımından əhəmiyyəti çox yüksəkdir.
Nazir müavini qeyd edib ki, bundan əlavə, həmin regionda əlvan və qiymətli metallardan qızıl, gümüş və mis hasilatı ilə məşğul olan müəssisə də fəaliyyət göstərir və daha bir müəssisənin fəaliyyətə başlaması gözlənilir.
N.Səfərov vurğulayıb ki, hazırda Azərbaycanda müxtəlif təyinatlı sənaye parklarının (Sumqayıt Kimya Sənaye və Yüksək Texnologiyalar parkları) yaradılması istiqamətində tədbirlər həyata keçirilir. Artıq açılmış Sumqayıt Yüksək Texnologiyalar Parkında yaradılmış istehsal sahələrinin inkişaf etdirilməsi, yeni sahələrin yaradılması prosesi gedir.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
