Bakı. Aynur Əliyeva – APA-Economics. Azərbaycan Rabitə və İnformasiya Texnologiyaları Nazirliyinin (RİTN) tabeliyində olan İnformasiya Texnologiyalarının İnkişafı Dövlət Fondu (İTİDF) Müşahidə Şurasının müzakirəsinə yeni sənədlər təqdim edilib.
RİTN-dən «APA-Economics»ə verilən məlumata görə, Müşahidə Şurasının növbəti iclasında üç yeni sənəd müzakirə edilərək təsdiqlənməlidir. Bu, «İnformasiya Texnologiyalarının İnkişafı Dövlət Fondunun vəsaitləri hesabına kreditlərin verilməsi məqsədilə sahibkarlıq subyektləri tərəfindən təqdim edilən investisiya layihələrinin qiymətləndirilmə meyarları», «Azərbaycan Rabitə və İnformasiya Texnologiyaları Nazirliyinin tabeliyində İnformasiya Texnologiyalarının İnkişafı Dövlət Fondunun vəsaiti hesabına kreditlərin verilməsində müvəkkil kredit təşkilatı kimi iştirak etmək istəyən banklar və bank olmayan kredit təşkilatlarının Fondun Müşahidə Şurasına təqdim edəcəyi sənədlər», «Rabitə və İnformasiya Texnologiyaları Nazirliyi tabeliyində İnformasiya Texnologiyalarının İnkişafı Dövlət Fondunun vəsaitləri hesabına güzəştli kreditlərin alınması üçün sahibkarlıq subyektləri tərəfindən təqdim edilən investisiya layihələrinin tərtib edilməsinə dair tələblər»dir.
Fondun vəsaitləri hesabına kreditlərin verilməsi məqsədilə sahibkarlıq subyektləri tərəfindən təqdim edilən investisiya layihələrinin qiymətləndirilməsi 100 ballıq sistem üzrə həyata keçiriləcək, seçim meyarları kimi «İnvestisiya layihəsinin dövlətin İKT sahəsi üzrə siyasətinə və Fond tərəfindən müəyyən edilmiş prioritetlərə uyğunluğu» (30 bal), «İnvestisiya layihəsinin hazırlanmasına qoyulmuş minimal tələblərə uyğunluğu» (15 bal), «İnvestisiya layihəsi üzrə istehsalı nəzərdə tutulan məhsulun (iş və xidmətin) innovasiya tutumlu, idxalı əvəz edən və ixracyönümlü olması» (20 bal), «Layihənin iqtisadi səmərəlilik göstəriciləri» (20 bal), «Sahibkarlıq subyektinin biznes tarixi» (15 bal) müəyyən edilib. İnvestisiya layihələrinin qiymətləndirilməsi üzrə keçid balı 60 bal müəyyənləşdirilib.
Dövlətin İKT sahəsi üzrə siyasətinin həyata keçirilməsi və Fondun vəsaitlərinin daha səmərəli yerləşdirilməsi məqsədilə Azərbaycan prezidentinin fərman və sərəncamlarından və Dövlət Proqramlarından irəli gələn tədbirlərin reallaşdırılmasına uyğun olan layihələrin maliyyələşdirilməsinə üstünlük verilməlidir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
