Bakı. Kəmalə Quliyeva – APA. Milli Televiziya və Radio Şurasının (MTRŞ) səlahiyyət müddəti bitən İTV-nin Yayım Şurası üzvlüyünə elan etdiyi müsabiqəyə namizədlərin qəbulu başa çatıb.
MTRŞ-nin Aparat rəhbəri Toğrul Məmmədovun APA-ya verdiyi məlumata görə, idman federasiyaları, dini konfessiyalar və yaradıcılıq təşkilatları üzrə namizədlər MTRŞ-ya təqdim edilib.
İlkin məlumata əsasən, yaradıcılıq təşkilatları tərəfindən 7 (Azərbaycan Jurnalistlər Birliyi tərəfindən 2, Yazıçılar Birliyi tərəfindən 2, Rəssamlar İttifaqı tərəfindən 1, Bəstəkarlar İttifaqı tərəfindən 2 namizəd), dini konfessiyalardan 1 təşkilat tərəfindən 2 namizəd, idman federasiyalarından bir təşkilat tərəfindən 2 namizəd irəli sürülüb.
T. Məmmədov deyib ki, MTRŞ martın sonunda namizədlərin siyahısını Milli Məclisə təqdim edəcək. Milli Məclis irəli sürülən namizədlərdən hər istiqamət üzrə 1 nəfər olmaqla İTV-nin Yayım Şurası üzvlüyünə təsdiq edəcək.
Qeyd edək ki, bu il aprelin 17-də İTV-nin Yayım Şurasının üzvləri Ağacan Abıyev, Salman Musayev və Altay Zahidovun səlahiyyət müddəti başa çatır.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
