Sosial

Ana səhifə

Sosial

Azərbaycan əmək və əhalinin sosial müdafiəsi sahəsində Almaniya təcrübəsindən daha geniş yararlanmaq niyyətindədir

23 oktyabr 2008 16:11 (UTC +04:00)

Bakı. Rəşad Süleymanov – APA-Economics. Azərbaycanın əmək və əhalinin sosial müdafiəsi naziri Fizuli Ələkbərov Bakıda səfərdə olan Almaniya parlamentinin üzvü və parlamentlərarası dostluq qrupunun sədri Ştefan Rayxenin başçılıq etdiyi nümayəndə heyətini qəbul edib. Bu barədə «APA-Economics»ə Əmək və Əhalinin Sosial Müdafiəsi Nazirliyinin mətbuat xidmətindən məlumat verilib.
F.Ələkbərov Azərbaycanda əhalinin rifah halının yaxşılaşdırılması məsələsinin prioritet olduğunu söyləyib. Nazir bildirib ki, son beş ildə ölkədə 740 mindən artıq yeni iş yeri yaradılıb: «Ölkəmizdə bu gün yoxsulluq səviyyəsi 15%-dən aşağıdır, işsizlik səviyyəsi isə 6,6%-ə enib. Bu illərdə ölkədə minimum əmək haqqı 8,2 dəfə artıb və hazırda respublikada minimum əmək haqqı 75 manat, orta aylıq əmək haqqı isə 313 dollar təşkil edir».
Azərbaycanda sosial müdafiə sisteminin təkmilləşdirilməsi ilə bağlı nüfuzlu beynəlxalq təşkilatlarla, ayrı-ayrı ölkələrlə əməkdaşlığın daim genişləndirildiyini deyən nazir bildirib ki, bu sahədə Almaniya ilə əməkdaşlığa da xüsusi önəm verilir. İş yerlərində əmək qanunvericiliyinin tətbiqinə dövlət nəzarətinin daha effektli təşkili, sosial müdafiə sisteminin əhaliyə daha yaxın bir sistem kimi qurulması, məşğulluğun təminatı, habelə əmək potensialının iqtisadi inkişafa uyğun olaraq keyfiyyətcə yüksəldilməsi, rəqabətədavamlı işçi qüvvəsinin yetişdirilməsi, miqrasiya proseslərinin tənzimlənməsi və s. sahələrdə Almaniya ilə müəyyən təcrübə mübadiləsinin aparılması faydalı olardı. Nazir Almaniya ilə bütün sahələrdə olduğu kimi, əmək və sosial müdafiə sahəsində də əməkdaşlığın genişləndirilməsi üçün bütün lazımi səylərin göstəriləcəyini vurğulayıb.
Son bir il ərzində artıq üçüncü dəfədir ki, Azərbaycana gəldiyini deyən Ş.Rayxe isə Almaniya hökumətinin Azərbaycanla bütün sahələrdə əməkdaşlığın gücləndirilməsinə diqqət yetirdiyini qeyd edib. Ş.Rayxe əmək və sosial müdafiə sahəsində iki ölkə arasında əməkdaşlığın bundan sonra da davam və inkişaf etdiriləcəyinə əminliyini bildirib.