Sosial

Ana səhifə

Sosial

Dövlət Sosial Müdafiə Fondunda «190» nömrəli telefon məlumat xidməti yaradılıb

30 oktyabr 2008 08:51 (UTC +04:00)

Bakı. Nicat Mustafayev – APA-Economics. Azərbaycan Dövlət Sosial Müdafiə Fondunda (DSMF) müasir tipli «Mərkəzləşdirilmiş Sorğu Mərkəzi» («190» nömrəli telefon məlumat xidməti) yaradılıb. Bu barədə «APA-Economics»ə DSMF-nin ictimaiyyətlə əlaqələr sektorunun müdiri Elman Babayev məlumat verib.
E.Babayevin sözlərinə görə, xidmətin yaradılmasında başlıca məqsəd ictimaiyyətlə əlaqələri daha da inkişaf etdirmək, əhalinin sığorta-pensiya sistemi ilə bağlı suallarını operativ şəkildə cavablandırmaqdır. Məlumat xidməti tərəfindən telefon vasitəsi ilə məcburi dövlət sosial sığortası, pensiya məsələləri, fərdi uçotun təşkilinə aid sualların və müraciətlərin operativ şəkildə cavablandırılması həyata keçiriləcək.
«Ümumiyyətlə, sığortaolunanlar, pensiyaçılar, eləcə də hər bir vətəndaş pensiya sistemi ilə bağlı onu maraqlandıran istənilən məsələyə «190» nömrəli telefona müraciət etməklə cavab tapa bilər», - deyə E.Babayev vurğulayıb.
Qeyd edək ki, telefon xidməti ödənişsizdir və ayrı-ayrı xidmət rejimləri olmaqla fasiləsiz fəaliyyət göstərir. Vətəndaşlar ölkənin hər bir regionundan, habelə mobil telefonlardan «190» telefon məlumat xidmətinə müraciət etməklə sığorta-pensiya sistemi ilə bağlı istənilən suala cavab tapa bilərlər.