Sosial

Ana səhifə

Sosial

Hüseynqulu Bağırov: «Noyabrın sonunadək Abşeronda 500 mindən artıq ağac əkiləcək»

10 noyabr 2008 11:13 (UTC +04:00)

Bakı. Nicat Mustafayev – APA-Economics. Azərbaycan Ekologiya və Təbii Sərvətlər Nazirliyi Bakı şəhərində yeni salınmış avtomobil yollarının ətrafında yaşıllaşdırma işlərinə başlayıb.
«APA-Economics»in məlumatına görə, yaşıllaşdırma işlərində iştirak edən Azərbaycanın ekologiya və təbii sərvətlər naziri Hüseynqulu Bağırov qeyd edib ki, əslində yaşıllaşdırma işlərinə çoxdan başlanılıb və Nazirlik Abşeron yarımadasında ağacların əkilməsi mövsümünü gözləyirdi: «Bütün Azərbaycanda, o cümlədən Abşeron yarımadasında kütləvi yaşıllaşdırmaya başlamışıq. Bu işlər həm yeni qurulan yolların kənarında, həm ayrı-ayrı əkililərə yararlı yerlərdə aparılır».
Nazir onu da qeyd edib ki, Abşeron yarımadasında əsasən zeytun ağacları əkilir və yaxın 2-3 gün ərzində 14 min Azərbaycanda yetişdirilən şitillər basdırılacaq, bundan başqa, xaricdən gətirilən (İspaniya, İtaliya, Sloveniya) zeytunun digər növlərindən olan 90 min ağac əkiləcək.
«Bu işlər Bakı aeroportuna gedən yeni yolun ətrafında aparılacaq ki, yolun ümumi uzunluğu 23 km (hər bir tərəfi 11,5 km) təşkil edir, yaşıllıq zolağının eni isə ən azı 100 metr olacaq. O cümlədən, 190 hektarlıq ərazidə ağacların əkilməsi başa çatmaq üzrədir və bu mövsümün sonunadək işlər başa çatdırılacaq», - deyə H.Bağırov bildirib.
Nazirin sözlərinə görə, bu ərazidə 71 min kubmetr torpaq işlərinin aparılması nəzərdə tutulsa da, faktiki olaraq 235 min kubmetr iş aparılıb: «Neftlə çirkli torpaqlar təmizlənib, 14-15 min kubmetr neftlə çirklənmiş torpaqlar buradan götürülüb emal olunmağa aparılıb, 12 min kubmetr peyinlə və gübrə ilə qarışdırılmış torpaqlar gətirilib. Bundan başqa, suvarma üçün 10 quyu qazılıb ki, saatda 100 km ərazini suvarmaq mümkündür. Həmçinin 75 km suvarma şəbəkəsi qurulub başa çatmaq üzrədir. Burada 200 minədək ağac əkiləcək ki, bunlardan 100 mini zeytun, 14 mini nar ağacı olacaq. Həmin ərazidə artıq 43 min ağac əkilib, noyabrın sonunadək bu ərazidə əkin işləri başa çatdırılacaq.
H.Bağırov həmçinin bildirib ki, aeroport ərazisinə qədər 250 hektar, aeroporta gedən təzə yol ətrafında 190 hektar və digər ərazilərdə yaşıllıq işləri aparılır. Noyabrın sonunadək təkcə Abşeron yarımadasında 500-600 min ağac əkiləcək.
«Torpaqlar şoran, mineral və neftlə çikrlənmiş olduğundan, 1-2 il müddətində torpaqlar yuyulmalıdır və bundan sonra suvarma sisteminə əlavə qurğular quraşdırılacaq ki, damcılı suvarma sistemi yaradılsın. Bunun nəticəsində, işlərin 90-95%-i yerinə yetiriləcək», - deyə H.Bağırov bildirib.