Sosial

Ana səhifə

Sosial

Azərbaycanda «İnsan resurslarının idarə edilməsi» mövzusunda seminar keçirilir

11 noyabr 2008 13:46 (UTC +04:00)

Bakı. Nicat Mustafayev – APA-Economics. Bakıda Azərbaycan Dövlət Sosial Müdafiə Fondu (DSMF) tərəfindən təşkil olunmuş «İnsan resurslarının idarə edilməsi» mövzusunda üçgünlük seminar keçirilir.
DSMF-nın ictimaiyyətlə əlaqələr sektorunun müdiri Elman Babayevin «APA-Economics»ə verdiyi məlumata görə, seminar Almaniya Federal Pensiya Sığorta İdarəsi ilə DSMF arasında imzalanmış 2008-2009-cu illər üzrə əməkdaşlıq və dostluq münasibətlərinin möhkəmləndirilməsini nəzərdə tutan sazişə əsasən keçirilir. Sayca 6-cı olan görüşdə sığorta-pensiya islahatlarının müasir mərhələsində aktual olan «İnsan resurslarının idarə edilməsi» məsələsi müzakirə olunur. Seminarda Almaniya tərəfdən Federal Pensiya Sığorta İdarəsinin kadrlar şöbəsinin müdir müavini Yurgen Körper, təşkilati məsələlər üzrə bölmənin müdiri Vofqanq Yedke, Almaniya Pensiya Sığorta İdarəsinin yanında sosial sığorta sahəsində mütəxəssislərin hazırlığı üzrə ali məktəbin direktoru Stefan Lovin iştirak edir. Seminarın ilk günündə müzakirə edilən məsələ üzrə DSMF-nin iş prinsipləri ilə nümayəndə heyətinin tanışlığı təşkil olunub. Y.Körper «Kadrların səmərəli idarə edilməsi» mövzusunda təqdimatla çıxış edib və kadrların idarə edilməsi, seçilməsi, inkişaf etdirilməsi, planlaşdırılması istiqamətində öz ölkəsinin təcrübəsi barədə danışıb. Noyabrın 12-də isə seminarda DSMF əməkdaşları üçün «İş prosesinin təkmilləşdirilməsi və tələb olunan ştat vahidlərinin sayının müəyyənləşdirilməsi» istiqamətində təcrübə mübadiləsi aparılacaq.
Qeyd edək ki, DSMF-nin nümayəndə heyətinin 2007-ci ilin dekabrında Almaniyaya səfəri zamanı Fondla Almaniya Federal Pensiya Sığorta İdarəsi arasında ikitərəfli saziş imzalanıb və həmin sənəd çərçivəsində tərəflərin nümayəndə heyətlərinin qarşılıqlı səfərlərinin, birgə seminarların təşkili davam etdirilir. İndiyə qədər üç analoji görüş Almaniyada, iki görüş isə Azərbaycanda keçirilib, sosial sığorta haqlarının toplanmasında işəgötürənlər üzərində nəzarət, sığortaolunanların fərdi uçotu, pensiya təyinatı üzrə qurumların fəaliyyəti, mətbuat və ictimaiyyətlə iş, informasiya təhlükəsizliyi, informasiya texnologiyalarının arxitekturası məsələləri birgə müzakirə olunub.