Sosial

Ana səhifə

Sosial

Zaqatalada Osmanlı imperatoru II Sultan Səlimin adı ilə bağlı gümüş sikkə tapılıb

11 noyabr 2008 14:28 (UTC +04:00)

Zaqatala. Vüqar Heydərov –APA. Zaqatalada Osmanlı imperatoru II Sultan Səlimin adı ilə bağlı gümüş sikkə tapılıb. Bu barədə APA-nın Şəki-Zaqatala bürosuna Zaqatala rayon Tarix-Diyarşünaslıq Muzeyinin direktoru Cahangir Soltanov məlumat verib. Məlumata görə, sikkənin üzərindəki ərəb yazılarını oxuyan mütəxəssislər bunun, Osmanlı imperatoru II Sultan Səlimin (1566-1574) hakimiyyəti illərində həkk olunduğu barədə yekdil fikirdə olduqlarını söyləyiblər. Sikkənin aversində ərəb dilində “Sultan Süleyman oğlu Sultan Səlim zəfəri uca olsun. Novabərdədə 974-cü ildə zərb olunmuşdur” sözləri yazılıb. Sikkənin reversində isə yenə də imperator II Sultan Səlimə aid olan “Sikkəni zərb edən dənizdə və quruda Tanrının yardımına arxalanan izzət sahibi” sözləri həkk edilib.
C. Soltanov həmçinin tapılmış sikkənin xalis gümüş olduğunu, onun çəkisinin 4,6 qram, diametrinin isə 20 mm təşkil etdiyini bildirib. Muzey direktoru tapıntının Osmanlı imperatorluğunun müasir Serbiya ərazisində olan sikkəxanalarından birində, hicri tarixi ilə 974-cü ildə (miladi təqvimlə 1567-ci il) zərb olunduğunu diqqətə çatdırıb. C. Soltanovun sözlərinə görə, Zaqatala muzeyində saxlanılan bu sikkə on birinci Osmanlı imperatoru olan, II Sultan Səlimin hakimiyyətinin birinci ilində hazırlanıb. O deyib ki, Sultan II Səlimin hakimiyyəti illərində zərb olunan bu sikkə tədavüldə daha dəyərli və etibarı daha yüksək olduğundan sürətlə yayılıb və Azərbaycan torpaqlarında da tədavül vasitəsi kimi istifadə edilib: “Sikkənin Azərbaycanın şimal-qərb torpaqlarına, yəni Zaqatala bölgəsinə qədər gəlib çıxması, bu bölgənin Osmanlı imperiyası ilə tarixi əlaqələrinin olmasından xəbər verən bir amildir.
C. Soltanov Zaqatala muzeyində çoxlu sayda anonim mənşəli eksponatların olduğunu bildirib və qeyd edib ki, muzeydə bu anonim eksponatları araşdırmaq üçün tarixçilərdən, filoloqlardan, ərəb dili mütəxəssislərdən ibarət qrup fəaliyyət göstərir.