Sosial

Ana səhifə

Sosial

Təhsil Nazirliyi “Qaynar xətt”in araşdırmalarının nəticəsini açıqlayıb

17 fevral 2009 12:35 (UTC +04:00)

Bakı. İlhamə İsabalayeva –APA. Təhsil Nazirliyində qış imtahan sessiyası ilə əlaqədar yaranan “Qaynar xətt”ə yanvar ayı ərzində 86 müraciət daxil olub. Nazirlikdən APA-ya verilən məlumata görə, müraciətlərin 17-i anonim, 69-u ünvanlı olub. Ünvanlı müraciətlər araşdırmaya yönəldilib. Anonim olmasına baxmayaraq, bu şikayətlərdə də qaldırılan məsələlər üzrə aidiyyəti təhsil müəssisələrinə həmin sahə üzrə nəzarətin gücləndirilməsi tövsiyə edilib. Araşdırmaya yönəldilmiş müraciətlərin bir qisminin sonradan -araşdırma zamanı anonim olduğu aşkarlanıb. 69 ünvanlı müraciətdən 9-u sorğu və məlumat xarakterli olub.
Ümumilikdə 86 müraciətin 47-i ali və orta ixtisas təhsili müəssisələri ilə əlaqədar olub, onlardan 11-i anonim, 6-sı sorğu məzmunu daşıyıb. Ali və orta ixtisas təhsili müəssisələri ilə əlaqədar ünvanlı daxil olan müraciətlərin 12-i dövlət , 13-ü isə özəl təhsil müəssisələrinə aid olub.
Sessiyası dövründə özəl ali təhsil müəssisələri ilə əlaqədar daxil olan müraciətlərin sayı dövlət ali və orta ixtisas məktəbləri ilə bağlı ünvanlı şikayətlərdən çox qeydə alınıb.
Dövlət ali və orta ixtisas təhsil müəssisələrindən daxil olan 12 ünvanlı müraciətin 2-si müəllimlər tərəfindən iş yeri ilə bağlı olub, hər iki məsələ üzrə araşdırma aparılaraq nəticəsi şikayətçilərə bildirilib. Digər şikayətlərdən 4-ü Azərbaycan Dövlət Neft Akademiyasından daxil olub, bu şikayətlərdən 2-si bilavasitə imtahan sessiyası ilə əlaqədar olub, araşdırma aparılaraq obyektivlik təmin edilib. Akademiya ilə əlaqədar daha 2 müraciətdə bu təhsil müəssisəsinə məxsus binada yerləşən 145 saylı uşaq bağçasının bağlanılması ilə əlaqədar olub. Araşdırma zamanı uşaq bağçasının icarə müqaviləsi ilə istifadə etdiyi binadan çıxarıldığı məlum olub. Azərbaycan Dövlət Pedaqoji Universiteti ilə əlaqədar daxil olan 2 müraciətdə tələbələr imtahan işlərinə az bal verildiyini bildirib, araşdırma zamanı hər iki tələbənin imtahan işinin düzgün qiymətləndirildiyi üzə çıxıb. Bakı Dövlət Universitetində imtahanla əlaqədar daxil olmuş 1 müraciət də araşdırılarkən imtahan zamanı tələbənin biliyinin obyektiv qiymətləndirildiyi məlum olub. Azərbaycan Texniki Universiteti ilə əlaqədar “Qaynar xətt”in e-mail ünvanına daxil olan 1 müraciətdə ümumi məsələlər sadalanmış, bununla bağlı nazirlik və universitet tərəfindən müraciət müəllifi araşdırmaya dəvət olunub. Lakin özünü Cənnət Budaqov kimi təqdim edən müəllif araşdırmaya gəlməyıb. Ona görə də həmin müraciət üzrə araşdırma aparmaq mümkün olmayıb.
Özəl ali təhsil müəssisələri ilə bağlı daxil olan ünvanlı müraciətlərin 6-sı Azərbaycan Beynəlxalq Universitetinin, 3-ü Bakı Biznes Universitetinin, 2-si Bakı Qızlar Universitetinin, 1-i Xəzər Universitetinin, 1-i isə Bakı Kooperasiya Universitetinin payına düşür. Bu müraciətlərin 6-sı bilavasitə imtahan sessiyası ilə bağlı olub, onlardan 3-ü Azərbaycan Beynəlxalq, 1-i Bakı Biznes, 1-i Bakı Qızlar, 1-i isə Xəzər Universiteti tələbələri tərəfindən edilib. Üç müraciət özəl ali məktəblərdə təhsil haqqının artırılması ilə əlaqədar olub. Hər 3 hal araşdırılıb, məlum olub ki, özəl ali məktəblərdə təhsil haqqının ödənilməsi müəssisə ilə təhsil alanların arasında bağlanılmış müqavilə öhdəlikləri əsasında həyata keçirilir. Digər 2 şikayət Azərbaycan Beynəlxalq Universitetində diplom blankı üçün rüsum tələb olunması haqqında olub. Bununla əlaqədar şikayətçilərə tələbə ilə təhsil aldığı ali məktəb arasında bağlanmış ikitərəfli müqavilədəki məbləğdən başqa hər hansı ödənişin tələb olunmasının qeyri-qanuni olduğu bildirilib. Özəl ali təhsil müəssisələrini əvvəlki illərdə bitirmiş məzunlara təhsil müəssisəsi tərəfindən diplom blankının verilməməsi ilə bağlı müraciət edənlərə bu problemin təhsil müəssisəsinin özündə araşdırılması tövsiyə olunub.