Sosial

Ana səhifə

Sosial

ABŞ Dövlət Departamenti: “Azərbaycan hökuməti insan alverinə qarşı mübarizədə səylərini artırıb”

17 iyun 2009 10:49 (UTC +04:00)

Bakı. Viktoriya Dementyeva-APA. “Azərbaycan hökumətinin insan alverinə qarşı mübarizə işinin təşkili standartlara uyğun deyil, lakin bu məsələdə ciddi səylər göstərir”. APA-nın məlumatına görə, bu fikirlər ABŞ Dövlət Departamenti tərəfindən 2008-ci il üçün hazırlanmış insan alverinə qarşı mübarizəyə dair illik hesabatda əksini tapıb. Hesabatda bildirilir ki, hökumətin səylərinə baxmayaraq, insan alveri ilə məşğul olanların və onlarla əlbir olan şəxslərin cinayət məsuliyyətinə cəlb olunması, mühakimə edilməsi və cəzalandırılması istiqamətində ciddi irəliləyiş əldə olunmayıb: “Lakin Azərbaycan hökuməti bu sahədə vəziyyətin yaxşılaşdırılması üçün müəyyən addımlar atır. 2009-cu ilin fevralında hökumət tərəfindən traffikinqə qarşı mübarizəyə dair yeni Milli Fəaliyyət Planı qəbul edilib, lakin bu planın həyata keçirilməsi üçün vəsait ayrılmayıb. Ümumiyyətlə antitarffikinq layihələrinin maliyyələşdirilməsi səviyyəsi hələ də aşağıdır”.

Hesabatda qeyd olunur ki, Azərbaycan yenə də kişi, qadın və uşaqların seksual istismar və məcburi əməyə cəlb edilmək üçün digər dövlətlərə aparılmasında tranzit ölkə funksiyasını yerinə yetirməkdə qalır: “Həmçinin Azərbaycan vətəndaşları, o cümlədən qadın və uşaqların seksual istismar və kommersiya məqsədilə Türkiyə və Birləşmiş Ərəb Əmirliklərinə aparılması davam edir. Kişi və azyaşlı oğlan uşaqları isə məcburi əməyə cəlb olunmaq üçün Rusiyaya aparılırlar. Bəzi kişilər Azərbaycanın daxilində məcburi əməyə cəlb olunmaq üçün ticarət obyektinə çevrilir. Qadınlar və uşaqlar fahişəliyə və məcburi əməyə cəlb olunur, həmçinin, dilənçiliklə məşğul olmağa məcbur edilirlər. Azərbaycan insan ticarəti qurbanlarının Moldova, Özbəkistan və Qazaxıstandan Türkiyə və Birləşmiş Ərəb Əmirliklərinə daşınmasında tranzit ölkə kimi də istifadə edilir. Ukrayna, Moldova, Özbəkistan və Rusiyadan bəzi kişi və qadınların seksual istismar məqsədilə Azərbaycana gətirildiyinə dair də faktlar var”.

Hesabatda bildirilir ki, 2008-ci ildə qeyri-hökumət təşkilatları və hüquq-mühafizə orqanları tərəfindən 121 traffikinq qurbanı aşkarlanıb, 55 nəfərə dövlət hesabına sığınacaq verilib. Müqayisə üçün qeyd edək ki, dövlət 2007-ci ildə 29 nəfər traffikinq qurbanına sığınacaq verib.

Sənəddə bildirilir ki, hesabat dövründə Azərbaycan hökuməti traffikinqin profilaktikası istiqamətində səylərini artırıb: “Hökumət traffikinqə qarşı mübarizəyə dair ümumi kampaniya aparıb, o cümlədən qəzet və telekanallarda reklamlar yerləşdirilib. Bundan başqa, hökumət insan ticarətindən bəhs edən “Məni müdafiə elə” adlı sənədli filmin çəkilməsinə vəsait ayırıb və bu film bir neçə telekanalda nümayiş olunub. İnsan ticarəti qurbanlarının müraciət etməsi üçün “Qaynar xətt”in yaradıldığı da anons edilib. Bu addım effektli olub və “Qaynar xətt”ə müraciətlər əsasında ən azı 8 nəfər insan ticarətinin qurbanını aşkarlamaq mümkün olub”.

Hesabatın sonunda traffikinqə qarşı mübarizə işini gücləndirmək üçün Azərbaycan hökumətinə ünvanlamış bəzi tövsiyələr əksini tapıb. Sənəddə qeyd olunur ki, traffikinq probleminin həlli baxımından insan ticarəti ilə məşğul olanlar barədə təhqiqat aparılması və onların mühakimə edilməsi üçün müvafiq orqanların səlahiyyətləri artırılmalıdır. Tövsiyələr sırasında insan ticarətinə qarşı fəaliyyətin koordinasiya edilməsi, traffikinq qurbanlarına, xüsusilə uşaqlara yardımların artırılması, məişət zorakılığına məruz qalanlara onların polisə rəsmi müraciət etməsini tələb etmədən ilkin yardım göstərilməsi və s. daxildir.