Sosial

Ana səhifə

Sosial

Mayın 5-dən indiyədək Respublika Taun Əleyhinə Stansiyaya 95 şübhəli qrip nümunəsi daxil olub

23 iyun 2009 10:04 (UTC +04:00)

Bakı. Kəmalə Quliyeva - APA. Mayın 5-dən indiyədək Respublika Taun Əleyhinə Stansiyaya 95 şübhəli qrip nümunəsi daxil olub. Nümunələrdən 75-i ekspress üsulla, daha ağır formada olan 20-si isə zəncirvarı reaksiya üsulu ilə yoxlanılıb. APA-nın məlumatına görə, bu barədə Respublika Taun Əleyhinə Stansiyanın elmi işlər üzrə direktor müavini Rakif Abdullayev bildirib. Onun sözlərinə görə, şübhəli qrip nümunələrindən yalnız ikisində +B mənşəli qrip aşkara çıxıb, qalan nümunələr isə mənfi nəticə göstərib.

Direktor müavini deyib ki, səhiyyə nazirinin A/H1N1 virusu (“donuz qripi”) əleyhinə hazırlıqla bağlı bu il aprelin 28-də verdiyi 49 saylı əmrinə əsasən, bütün ölkə üzrə qrip mənşəli xəstəliklər üzərində nəzarət gücləndirilib. Sanitar Karantin Müfəttişliyinin sərhəd keçid məntəqələrində qızdırmalı xəstələrlə bağlı məlumatların Gigiyena və Epidemiologiya Mərkəzinə təqdim etdiyini deyən R. Abdullayev bildirib ki, Respublika Taun Əleyhinə Stansiyada 530 3213 nömrəli “qaynar xətt” fəaliyyət göstərir. “Qaynar xətt”ə hər gün saat 21.00-dək cavab verən əməkdaşlar qrip mənşəli infeksiyalarla bağlı sualları cavablandırırlar.

R. Abdullayev deyib ki, Səhiyyə Nazirliyi tərəfindən ölkənin beş böyük şəhərində - Bakı, Gəncə, Şirvan, Sumqayıt və Mingəçevirdə qripə bənzər xəstəliklər üzərində müntəzəm nəzarət aparılır, bu məlumatlar ötən ilki məlumatlarla tutuşdurulur. Əgər xəstəlik ağır gedişlidirsə, xəstənin qan nümunələri 24 saat ərzində Səhiyyə Nazirliyinin Taun Əleyhinə Stansiyasının referens laboratoriyasına göndərilir.

Xəstə şəxslər üzərində müşahidə isə daha bir həftə davam etdirilir.