Sosial

Ana səhifə

Sosial

Kürdəmirin Şilyan kəndinin məktəblərində şagirdlərə geyimlər üçqat baha qiymətə satılır - ARAŞDIRMA

Kürdəmirin Şilyan kəndinin məktəblərində şagirdlərə geyimlər üçqat baha qiymətə satılır - <font color=red>ARAŞDIRMA</font>

18 sentyabr 2009 10:21 (UTC +04:00)

Kürdəmir-APA. Kürdəmirin Şilyan kəndinin sakinləri şagirdlərə məktəbli formasının məcbur qaydada baha qiymətə satılmasına etiraz ediblər. APA-nın kənd sakinlərinin müraciəti əsasında Şilyana ezam olunmuş müxbirinin verdiyi məlumata görə, rayon mərkəzindən 20 kilometr aralıda yerləşən və 10 mindən artıq əhalisi olan Şilyan kəndində 3 orta ümumtəhsil məktəbi fəaliyyət göstərir.

Kənd sakinləri APA-ya açıqlamasında bu gün məktəblərin təhsil ocağından daha çox bazara oxşadığını bildiriblər: “Kənd məktəblərində şagirdlərə geyimlər, jurnallar, qiymət kitabçaları məcburi qaydada satılır, təhsil müəssisələrinin təmiri və uşaqların sığortalanması üçün pul yığılır. Şagirdlərdən pul yığa bilmədikdə isə məktəb rəhbərliyi müəllimləri evlərə göndərərək valideynlərdən pul tələb edir. İmkansız valideynlər tələb olunan məbləği ödəyə bilmədikdə isə müəllimlər məcbur olur ki, öz əmək haqlarının bir hissəsini valideynlərin əvəzinə şagirdlərin geyiminə və digər “xərclər”ə sərf etsinlər. Ötən il də kəndimizin məktəblərində vəziyyət bu cür olub. Çünki yuxarıdan belə tələb qoyulub ki, müəllimlər, sinif rəhbərləri öz şagirdlərini yeni formalarla təmin etməlidir. Müəllimlər də son vaxtlar onların əmək haqlarının 3 faizinin uşaq fondu adı ilə tutulmasından da narazıdır”.

Adlarının açıqlanmasını istəməyən müəllimlər əməkdaşımızla söhbətdə bildiriblər ki, məktəb direktorlarışagird geyimlərinin pulunun sentyabrın 19-dək yığmağı tələb edirlər: “Şagird geyimi üçün hər məktəbdən 4500 manata yaxın vəsait toplamaq tələb olunur. Deyilənə görə, tələb olunan geyim pullarını ödəməklə bağlı çıxılmaz vəziyyətdə qalan direktorlar kreditlə pul götürmək üçün banklara müraciət edirlər”.

Kənd sakinləri bu səbəblərdən müəllim və şagirdlərin dərsdən, tədris və təlim-tərbiyə işlərindən uzaq düşərək kommersiya fəaliyyəti ilə məşğul olduqlarını deyiblər: “İndi onları yalnız bir şey düşündürür - görəsən, bu geyim məsələsi nə vaxt öz müsbət həllini tapacaq? Bu qanunsuz pul yığımı məsələsinə görə, müəllimlərlə yanaşı direktorlar da camaat qarşısında üzüqaradır. Direktorlar pul yığılmasına etiraz edən valideynlərə deyirlər ki, hara istəyirsiniz, şikayət edin. Əgər sizin sözünüzü eşitsələr, onda bizim də bu alver işlərindən canımız qurtarar”.

Kənd sakinlərinin narazılığına səbəb olan məsələlərdən biri məktəbli geyimlərinin onlara mağazadakı qiymətdən 3 qat baha satılmasıdır: “Hazırda kəndin məktəblərində hər üç şagirddən yalnız biri dərsə təzə formada gedir. Digər uşaqlar isə adi geyimdə məktəbə gedirlər. Məktəblərə paylanılan təzə şagird geyimləri isə direktorların otağında öz müştərilərini gözləyir. Mağazalarda 10-12 manata olan məktəbli formasını direktorlar şagirdlərə 30-35 manata məcbur satırlar”.

Sakinlərin sözlərinə görə, məktəblərə geyimlər şagirdlərin sayına uyğun olaraq paylanılıb. Lakin bu işdə də problem yaranıb - təhsil müəssisələrində satılan geyimlərin çoxu uşaqların bədən ölçülərinə uyğun gəlmir: “Keyfiyyətsiz tikilən bu geyimlər uşaqların ölçüsündən ya böyük olur, ya da kiçik. Odur ki, şagirdlər direktorun “qara dəftər”inə düşməmək üçün bu lazımsız paltarlara əlavə 30-35 manat pul xərcləyir, həmin paltarları evdə saxlayır, əvəzində isə mağazadan öz ölçüsünə uyğun məktəbli geyimi alaraq istifadə edirlər”.

Valideynlər bu vəziyyətin artıq üç ildir davam etdiyini deyiblər: “Kiminsə marağına xidmət edən və hansısa işbaza küllü miqdarda qazanc gətirən geyim satışı siyasəti artıq bizi hövsələdən çıxarıb. Ötən il övladlarımız üçün məktəbdən bir geyimi 25 manata alırdıqsa, indi həmin paltar 10 manat da baha satılır. Özü də tələb edirlər ki, şagirdlər ötən ilki geyimlərdən bu dərs ilində istifadə edə bilməzlər, mütləq yenisini almalısınız”.

Şilyan kənd sakini, 4 uşaq atası Nemət Əbdürrəhmanov APA-ya imkansızlıq ucbatından hələ də məktəbli geyimi ala bilmədiyini deyib. Onun sözlərinə görə, şagirdlərə geyimlər məktəbdən ulsuz verilməlidir. Kənd sakini Səhhət Abışov isə məktəbdə oxuyan 5 uşağın hər birinə 12 manatlıq forma aldığını və direktorun məcburi qaydada satmaq istədiyi geyimdən imtina etdiyini bildirib. Kənd sakinlərindən Nəriman Həbibov və Vüqar Mikayılov isə uşaqlarına məktəbli formasının məcburi verilməsinə və həmin paltarın mağaza qiymətindən çox baha olmasına etiraz edərək səhəri gün paltarları direktora qaytarıblar.

Əməkdaşımız Elxan Zülfüqarov adına Şilyan kənd orta məktəbin direktoru Xidmət Əhmədov və Zahid Əhmədov adına Şilyan kənd orta məktəbinin direktoru Fizuli Hidayətovu tapa bilmədiyinə görə onların məsələyə münasibətini öyrənə bilməyib. Elşad Qurbanov adına Şilyan-Qarasu kənd orta məktəbin direktoru Abduləli Qocayev isə münasibətini iki cümlə ilə ifadə edib: “Paltar satışı məsələsinə görə heç bir söz deyə bilmərəm. Buna səlahiyyətim yoxdur”. Kürdəmir rayon Təhsil Şöbəsinin müdiri Tacəddin Novruzov isə APA-ya açıqlamasında məktəb direktorlarına şagirdlərin dərsə yeni məktəbli formasında gəlməsini təmin etmək tapşırığı verdiyi etiraf edib: “Mən direktorların iştirakı ilə keçirilən şura iclasında öz sözümü demişəm. Bütün məktəblərin rəhbərliyinə tapşırmışam ki, şagirdlərin hamısı dərsə yeni formalarda gəlməlidir. Amma direktorlar şagirdləri və valideynləri məktəbli formasını konkret yerdən almağa məcbur edə bilməzlər. Biz istəyirik ki, valideynlər övladları üçün bu paltarları bazardan alsın. Təhsil şöbəsi heç bir məktəbə geyim göndərməyib”.

Kürdəmir rayon icra hakimiyyətinin baş referenti Dövlət İdrisov da APA-ya açıqlamasında məsələyə münasibət bildirib: “Eşitdiyimə görə məktəbli formaları Kürdəmir rayon Təhsil Şöbəsinə Bakıdan gətirilir və oradan məktəblərə paylanılır. Məncə şagird geyimləri məktəbdə də, bazarda da eyni qiymətədir. Hələ məktəbdə qiymətlər bir az da ucuz olmalıdır”.

Kürdəmir rayon icra hakimiyyəti başçısının təhsil, səhiyyə və mədəniyyət məsələləri üzrə müavini Əbülfət Mikayılov isə mağazalarda kifayət qədər məktəbli geyimi olduğunu bildirib: “İnanmıram ki, Kürdəmir məktəblərində belə hal olsun. Yəni forma məktəbdə satıla bilməz. Əgər sizə bu barədə şikayət ediblərsə, biz bu məsələni yenidən araşdırarıq”.

P.S. Qeyd edək ki, Şilyan kənd məktəblərində baş verən neqativ hallarla bağlı jurnalist araşdırması aparılması Kürdəmir rayon Təhsil Şöbəsində narahatlığa səbəb olub. APA-ya telefon açan kənd sakinləri artıq rayon təhsil şöbəsinin müdirinin tapşırığı ilə məktəblərdə təcili iclasların keçirildiyini bildiriblər. İclaslarda məktəb direktorları müəllimləri sorğu-suala tutub, jurnalist təhqiqatı aparan media nümayəndəsi ilə nə barədə söhbət etdiklərini öyrənməyə çalışıblar.