Sosial

Ana səhifə

Sosial

Hüseyn Ənvari: «İmam Xomeyni İmdad Komitəsi» Azərbaycanda aztəminatlı ailələrə yardımlarını davam etdirəcək”

12 noyabr 2009 13:56 (UTC +04:00)

Bakı. Rəşad Süleymanov – APA-Economics. İran İslam Respublikasının «İmam Xomeyni İmdad Komitəsi» Azərbaycanda aztəminatlı və ehtiyacı olan insanlara yardımlarını növbəti illərdə də davam etdirəcək.

«APA-Economics»in məlumatına görə, bunu Azərbaycana səfərinə dair keçirdiyi mətbuat konfransında İmdad Komitəsinin sədri Hüseyn Ənvari bildirib.

Səfəri barədə məlumat verən H.Ənvari bildirib ki, noyabrın 10-dan başlayan səfər çərçivəsində Azərbaycan Milli Məclisində, Qaçqın və Məcburi Köçkünlərin İşləri üzrə Dövlət Komitəsində, Kənd Təsərrüfatı Nazirliyində və Səhiyyə Nazirliyində görüşlər keçirib. H.Ənvarinin həmçinin Ermənistanın işğalı nəticəsində məcburi köçkün düşmüş insanların müvəqqəti məskunlaşdığı ərazilərə baş çəkəcəyi də planlaşdırılır.

Bakıda komitənin təşkilatçılığı ilə sosial sərginin açıldığını xatırladan H.Ənvari ötən 16 il ərzində Azərbaycandakı fəaliyyətləri barədə də məlumat verib. Onun sözlərinə görə, «İmam Xomeyni İmdad Komitəsi» tərəfindən 16 il ərzində 45 rayon, 500 qəsəbə və kənddə əhalinin müxtəlif təbəqələrindən olan 40 min nəfərə yaxın məcburi köçkün, əlil, şəhid ailəsi, ailə başçısını itirmiş, tənha və kimsəsiz insana təmənnasız yardımlar göstərilib.

«Bizim Azərbaycana olan yardımlarımız davam edəcək. Komitə öz imkanları çərçivəsində məşğulluğun təmin olunması sahəsində layihələrə də dəstəyini davam etdirmək niyyətindədir», - deyə Ənvari qeyd edib.

Komitə rəhbəri onu da vurğulayıb ki, ötən il rəhbərlik etdiyi qurumun Azərbaycan ofisi tərəfindən 1500 ailəyə 1,5 mln. manat güzəştli kredit ayrılıb. Bu vəsait hesabına öz kiçik bizneslərini quran insanlar hazırda alınmış məbləği geri qaytarmaqdadırlar.