Sosial

Ana səhifə

Sosial

DSMF mərkəzi aparatının xərcləri 2 mln. manat azaldılıb

13 noyabr 2009 11:35 (UTC +04:00)

Bakı. Rəşad Süleymanov - APA-Economics. Gələn il Azərbaycanda pensiyaların baza hissəsində dəyişikliklərin edilməsi nəzərdə tutulur.

«APA-Economics»in bildirdiyinə görə, bu barədə Milli Məclisdə Dövlət Sosial Müdafiə Fondunun (DSMF) 2010-cu il büdcəsinin müzakirəsində fondun sədri Səlim Müslümov məlumat verib. Onun sözlərinə görə, pensiyaların baza hissəsinin 3,2 bənd artırılması planlaşdırılır.

DSMF-nin proqnozlarına əsasən, 2010-cu ildə pensiyaçıların orta illik sayı 1 mln. 337 min nəfərə çatacaq. Onlardan 850 min nəfəri yaşa görə, 317 min nəfəri əlilliyə görə, 140 min nəfəri isə ailə başçısını itirməyə görə pensiya alanlar olacaq. Yaşa görə pensiya alanların sayında 4,6 min nəfər, əlilliyə görə pensiya alanların sayında 9,8 min nəfər, ailə başçısını itirməyə görə pensiya alanların sayında isə 1,5 min nəfər artım gözlənilir.

DSMF-nin büdcəsi barədə məlumat verən MM-in Sosial siyasət komitəsinin sədri Hadı Rəcəbli bildirib ki, gələn ilin dövlət büdcəsindən DSMF-yə transfertlərin həcmi artırılaraq 593 mln. 705 min manata çatdırılıb. Büdcənin icmal göstəricisinin 18 mln. manat azalmasının səbəblərini izah edən komitə sədri bunun əslində belə olmadığını qeyd edib. Onun sözlərinə görə, cari ildə pensiyaların baza hissəsinin indeksləşməsi üçün nəzərdə tutulan 50 mln. manat Fondda toxunulmaz qalıb. Gələn il DSMF mərkəzi aparatının saxlanılması üçün nəzərdə tutulan xərclərin 2 mln. manat azaldılması da nəzərə alınmalıdır.

DSMF sədri Səlim Müslümov öncə 2009-cu il büdcəsinin gözlənilən icrası barədə məlumat verib. Onun sözlərinə görə, DSMF-nin 2009-cu il üçün gəlirlərinin 1 mlrd. 775 mln. manata qarşı 1 mlrd. 540 mln. manat, o cümlədən məcburi dövlət sosial sığorta haqları üzrə yığımın 1 mlrd. 42 mln. manat təşkil edəcəyi gözlənilir. Proqnozun az icra olunmasına səbəb olaraq DSMF sədri ölkə üzrə inflyasiyanın minimuma enməsi nəticəsində əməkhaqqının nəzərdə tutulan 35%-lik artıma qarşı faktiki 16,7% artımın gözlənilməsini göstərib.

Cari il üçün fondun gözlənilən büdcə xərclərinin 1 mlrd. 695 mln. manat (proqnozdan 80 mln. manat az) təşkil edəcəyi gözlənilir. Bu da inflyasiya olmadığından, pensiyaların baza hissəsinin proqnozlaşdırılan artımının reallaşmaması ilə bağlıdır.

S.Müslümov qeyd edib ki, 2010-cu ilin xərclərində əhaliyə ödənişlər 1 mlrd. 688,3 mln. manat və ya bütün xərclərin 96,1%-ni təşkil edəcək. O cümlədən pensiyalara ödənişlər üçün 1 mlrd. 634 mln. manat yönəldiləcək. Öz növbəsində bunun 1 mlrd. 139 mln. manatı pensiyaların baza, 435 mln. manatı sığorta hissəsinin maliyyələşdirilməsinə yönəldiləcək.

DSMF-nin gəlirlərinin əsas hissəsini isə məcburi sosial sığorta haqları – 1 mlrd. 220 mln. manat təşkil edəcək ki, bu da cari ilin gözlənilənindən 17,2% çox olacaq. Məcburi sosial sığorta haqlarının 525 mln. manatını büdcə təşkilatlarında çalışanlardan daxilolmalar (16,7% çox), 696 mln. manatını isə qeyri-büdcə sektorundan daxilolmalar (17,6% çox) təşkil edəcək. Gələn il sığorta haqları dərəcələrinin dəyişdirilməyəcəyini qeyd edən S.Müslümov hazırda fondda qeydiyyatda olan sığorta olunanların 1 mln. 850,5 min nəfər olduğunu qeyd edib. Bunun 1 mln. 394,2 min nəfərini muzdla işləyənlər, 456,3 min nəfəri isə özü işləyənlərdir. S.Müslümov onu da qeyd edib ki, 2003-cü ildə DSMF-də 1 mln. 302,4 min nəfər sığorta olunan qeydiyyatda olduğu halda, son 6 ildə onların sayı 348 min nəfər artıb. Gələn il üçün sığorta olunanların sayının 1 mln. 906 min nəfərə çatması gözlənilir.

Daha sonra çıxış edən deputatlar büdcə layihəsinə dair təkliflərini bildiriblər. Deputat Pənah Hüseyn layihənin yaşayış şəraiti aşağı səviyyədə olan insanların mənafeyini əks etdirmədiyini deyib.

Millət vəkili Əli Əhmədov isə çıxışında işləyə-işləyə pensiya almanın sosial ədalətsizlik olduğunu qeyd edib. Ə.Əhmədov DSMF-nin büdcəsinin bütün tələblərə cavab verdiyini vurğulayıb.

Digər deputatlar isə pensiyaların bankomatlar vasitəsilə verilməsinin müsbət hal olduğunu qeyd edərək, rayonlarda bankomat çatışmazlığının kənd yerlərində yaşayan insanlar üçün problemlər yaratdığını vurğulayıblar.

Qeyd edək ki, müzakirələr fasilədən sonra davam etdiriləcək.