Sosial

Ana səhifə

Sosial

Elmira Süleymanova Asiya ombudsmanlarının XI konfransında iştirak edib

13 noyabr 2009 20:19 (UTC +04:00)

Bakı – APA. Azərbaycan Respublikasının İnsan Hüquqları üzrə Müvəkkili Elmira Süleymanova Tailandın paytaxtı Banqkok şəhərində Asiya Ombudsmanlar Assosiasiyasının (AOA) XI konfransında iştirak edib.

Ombudsman Aparatının mətbuat xidmətindən APA-ya verilən məlumata görə, “Layiqli idarəetmə və bu sahədə islahatlarda Ombudsmanın rolu” mövzusunda keçirilmiş konfransın işində 15 ölkədən 23 nümayəndə iştirak edib. Tədbirə Tailand, Pakistan, Filippin, Yaponiya, İran, Vyetnam, Çin, Honq–Konq, Koreya, İndoneziya, Hindistan, Avstraliya, həmçinin Amerika Birləşmiş Ştatları və Kanadanın ombudsmanları qatılıblar. MDB ölkələrindən Azərbaycanla yanaşı, Özbəkistan, Qırğızıstan, o cümlədən Rusiya Federasiyasının subyekti olan Tatarıstan Respublikasının ombudsmanları tədbirdə iştirak ediblər.

Konfransda layiqli idarəetmənin mahiyyəti, bu sahədə müxtəlif ölkələrin təcrübəsi, həyata keçirilən islahatlar, həmçinin ombudsmanın bu istiqamətdə, o cümlədən insan hüquqlarının təmin olunmasında vətəndaş cəmiyyəti ilə əməkdaşlığı, eyni zamanda uşaq hüquqlarını müdafiəsi və ombudsmanın mediator (vasitəçi) kimi fəaliyyəti məsələləri müzakirə olunub.

Birinci plenar iclasa sədrlik edən Azərbaycan Ombudsmanı Elmira Süleymanova İran, Pakistan, Vyetnam ombudsmanlarının, həmçinin Kanadanın Ontario ştatı ombudsmanının məruzələrini, aparılan müzakirələri, səsləndirilən mülahizələri yekunlaşdıraraq, mövzu ilə bağlı tövsiyələrini konfrans iştirakçılarının diqqətinə çatdırıb.

İnsan hüquqlarını müdafiəsi üzrə keçirilən dördüncü plenar iclasda E.Süleymanova “Azərbaycanda insan hüquqlarının təşviqi və müdafiəsində Ombudsmanın imkanları” mövzusunda çıxış edib.

Tədbir iştirakçılarına Azərbaycan Ombudsmanının illik məruzələri, bəyanatları, Ermənistanın Azərbaycana qarşı təcavüzünü və terror aktlarını, habelə Xocalı soyqırımını əks etdirən disklər təqdim edilib.