Sosial

Ana səhifə

Sosial

İki tələbə müəllimi aldatdığına görə Azərbaycan Dövlət Pedaqoji Universitetindən xaric oluna bilər

17 noyabr 2009 15:21 (UTC +04:00)

Bakı. Elnur Məmmədli - APA. Müəllimləri aldatdığı və qiymət kitabçasındakı şəkilləri dəyişdirdiyi üçün Azərbaycan Dövlət Pedaqoji Universitetinin 2 tələbəsi ali məktəbdən xaric oluna bilər. “Tələbələrin Beynəlxalq Əməkdaşlığı” İctimai Birliyinin mətbuat xidmətindən APA-ya daxil olan məlumata görə, bu barədə universitetin mətbuat xidmətinin rəhbəri Mansur İbrahimov məlumat verib. Onun sözlərinə görə, ali məktəbin “Mühəndis Pedaqogikası və Bədii Qrafika” fakültəsinin 4-cü kurs tələbəsi Gülnar Səfərova “Termodinamika” fənnindən “qeyri-kafi” qiymət aldığı üçün tələbə yoldaşı Nailə Tağıyevadan onun əvəzinə imtahan verməyi xahiş edib.

Bu məqsədlə onlar “Qiymət Kitabçası”ndakı şəkillərini də dəyişiblər. G. Səfərovanın əvəzinə imtahana girən N. Tağıyeva imtahanı “uğurla” verib. Amma “Termodinamika” üzrə müəllim Kamil Abbasov tələbələrdən şübhələnib və məsələ araşdırıldıqda saxtakarlıq ortaya çıxıb. M. İbrahimov bildirib ki, həmin tələbələrin ali məktəbdən xaric olunmasına kifayət qədər əsas var: “Çünki onlar “Qiymət Kitabçası”ndakı şəkilləri dəyişdirməklə əslində sənədləri saxtalaşdırıblar”.

Tələbələrlə əlaqədar araşdırmaların davam etdiyini deyən M. İbrahimov yaxın günlərdə bununla bağlı qərar veriləcəyini bildirib: “Ciddi araşdırmalar aparılır və ola bilsin ki, həmin tələbələr sadəcə şiddətli töhmətlə cəzalandırılsın”.