Sosial

Ana səhifə

Sosial

Azərbaycan «Twinning» layihəsi çərçivəsində xarici ölkələrlə müqavilələr imzalayacaq

19 noyabr 2009 09:18 (UTC +04:00)

Bakı. Nicat Mustafayev – APA-Economics. Azərbaycan «Twinning» layihəsi çərçivəsində bir sıra ölkələrlə müqavilələr imzalayacaq. «APA-Economics»in məlumatına görə, bunu Azərbaycan Əmək və Əhalinin Sosial Müdafiəsi Nazirliyinin pensiya siyasəti şöbəsinin müdiri Vüqar Həsənov bildirib.

Onun sözlərinə görə, Azərbaycan Avropa Komissiyası və Dünya Bankı ilə apardığı müzakirələr nəticəsində Azərbaycanın sosial müdafiəsi sahəsində monitorinq, aktual hesablamalar, məlumatların təhlili, sosial büdcənin tərtib edilməsi mexanizminin yaradılması və digər işlərin həyata keçirilməsi üçün «Twinning» layihəsinin həyata keçirilməsinə dair qərar qəbul olunub: «Layihə çərçivəsində həmçinin Azərbaycanın sosial müdafiəsi sisteminin Avropa qanunvericilik bazasına uyğunlaşdırılması və bu sahədə islahatların aparılması nəzərdə tutulub. Bu məqsədlə kadr potensialının artırılması üçün bir neçə ölkəyə səfərlər təşkil olunacaq».

V.Həsənov onu da qeyd edib ki, layihə çərçivəsində həmçinin xarici ölkələrin uyğun sosial müdafiə sistemi modelinin seçilməsi, Azərbaycanla uyğunlaşdırılması və ölkədə tətbiqi nəzərdə tutulub: «Artıq Fransa, Almaniya və Avstriya kimi ölkələr bununla əlaqədar Azərbaycana müraciət edib və cari ilin dekabr ayının 4-7-də Azərbaycan tərəfi öz seçimini edəcək. Hansı ölkənin modeli uyğun gələrsə, onu da seçəcəyik. Həmin ölkələrlə müvafiq müqavilələr imzalanacaq».