Sosial

Ana səhifə

Sosial

Azərbaycanda əmək pensiyası alan şəxslərin sayı 1,3 mln. nəfərə yaxınlaşıb

25 noyabr 2009 09:37 (UTC +04:00)

Bakı. Nicat Mustafayev – APA-Economics. Bu ilin noyabr ayının 1-nə Azərbaycanda əmək pensiyası alan şəxslərin sayı 1 298 850 nəfər təşkil edib.

Dövlət Sosial Müdafiə Fondunun İctimaiyyətlə əlaqələr sektorunun rəhbəri Elman Babayevin «APA-Economics»ə verdi məlumata görə, Azərbaycanda əmək pensiyası alan şəxslərin sayı 1,3 mln. nəfərə yaxınlaşıb. Belə ki, bu ilin 10 ayı ərzində əmək pensiyaçılarının sayı 23 712 nəfər artaraq noyabrın 1-nə 1 298 850 nəfərə çatıb. Ümumilikdə isə ölkə üzrə əmək pensiyaçıları arasında qadınların sayı daha çoxdur.

Hazırda əmək pensiyaçılarının 60,5%-i (785 146 nəfər) qadınlar, 39,5%-i (513 704 nəfər) isə kişilərdir. Qadınlardan 383 547 nəfəri çoxuşaqlı analardır. Bundan başqa, əmək pensiyası alanların arasında dövlət qulluqçusu kimi pensiya alanların sayı 9 880 nəfər təşkil edir.

Əmək zədəsi və peşə xəstəliyi ilə əmək pensiyası alan şəxslərin sayı 4 560 nəfərdən ibarətdir. Ailə başçısını itirməyə görə əmək pensiyası alan şəxslərin sayı isə 138 311 nəfərdir. Onlardan 22 nəfəri Azərbaycan Milli Qəhrəmanlarının ailə üzvləridir.

Qeyd edək ki, əmək pensiyası – «Əmək pensiyaları haqqında» Qanunla nəzərdə tutulmuş qayda və şərtlərlə müəyyən edilən və məcburi dövlət sosial sığorta olunan şəxslərin onlara əmək pensiyası təyin olunduqdan əvvəl aldıqları əmək haqqı və digər gəlirlərin, yaxud sığorta olunan şəxslərin ölümü ilə əlaqədar onların ailə üzvlərinin itirdikləri gəlirlərin kompensasiyası məqsədilə vətəndaşlara aylıq pul ödənişidir. Əmək pensiyası 3 növdən ibarətdir ki, onlardan birincisi yaşa görə əmək pensiyası, ikincisi - əlilliyə görə əmək pensiyası, üçüncüsü isə ailə başçısını itirməyə görə əmək pensiyasıdır.

Azərbaycan Respublikasının qanunları ilə müxtəlif pensiya hüququ olan şəxslərə öz arzuları ilə yalnız bir pensiya təyin edilir.