Sosial

Ana səhifə

Sosial

Sumqayıtda inşa olunan sutəmizləyici qurğuda yoxlama işləri aparılır

01 dekabr 2009 07:57 (UTC +04:00)

Sumqayıt – APA. Sumqayıtda inşa olunan sutəmizləyici qurğuda su qəbuledici, ələyici, xırdalayıcı və suölçmə avadanlığının kompakt yerləşdirilməsi üçün dəmir-beton qutu tikilib, içi qumla doldurulub. Üç bölmədən ibarət qumtutucu şöbə və çirkab suları aerotenniklərə paylayan paylayıcı kamera tikilib və əlaqələndirici xətlər quraşdırılıb.

Sumqayıt şəhər İcra Hakimiyyətindən APA_ya verilən məlumata görə, qurğuda eyni zamanda üç ədəd bioloji təmizləmə aerotennikləri tikilib, lilötürücülər və arakəsmələr, texnoloji borular quraşdırılıb və daxili divarlar hidroizolyasiya edilib. Bundan əlavə, qurğuda çirkab suların tullantıları tökülən stabilizator şöbəsi, xidmət meydançası və təmizlənmiş su tökülən iki seksiyadan ibarət kontakt şöbəsi tikilib, üç ədəd il yığımı çəni və kollektor quraşdırılıb. Hava üfürücü xətlər üçün dəmir-beton dayaqlar qurulub və aerotenniklərə 530 və 820 mm-lik diametrli metal borulardan hava üfürücü xətlərin yığılması, qurğunun xlorlaşma, kompressor və mexaniki təmizləmə şöbələrinin tikinti işləri başa çatıb.

Təmizləyici qurğuda çirkab suların aerotenniklərə daxil olması üçün 1220 millimetrlik boru xətti çəkilib. Obyekti elektrik enerjisi ilə qidalandıracaq yarımstansiya işlək vəziyyətə gətirilib. Sınaq işləri aparılması üçün aerotenniklərə su verilib, hazırda qurğuda yoxlama işləri aparılır.

Qeyd edək ki, Azərbaycan Prezidenti İlham Əliyevin tapşırığı ilə 2005-ci ilin sonundan etibarən Sumqayıtda məişət çirkab suların təmizlənməsi üçün sutkalıq gücü 200 min kubmetr olan qurğunun inşasına başlanılıb. Ən müasir avadanlıqlarla təchiz edilən qurğunun tikintisi «Azərsu» Səhmdar Cəmiyyətinin sifarişi əsasında «Novruz-2006» MMC tərəfindən aparılır.

Sutəmizləyici qurğuda sənaye müəssisələrində yaranan tullantı sular deyil, şəhər və onun ətraf ərazilərində formalaşan məişət çirkab suların təmizlənməsi prosesi aparılacaq. Ən müasir texnologiya əsasında inşa edilən sutəmizləyici qurğu ətraf mühitin sağlamlaşdırılmasına və dəniz hövzəsinin çirklənməsinin qarşısının alınmasına xidmət göstərəcək.