Sosial

Ana səhifə

Sosial

UNİCEF-in Azərbaycan nümayəndəliyi 15 yaşlı Quba sakininin toy günü intihar etməsinə münasibət bildirib

03 dekabr 2009 15:44 (UTC +04:00)

UNECEF-in Azərbaycan nümayəndəliyindən APA-ya daxil olan müraciətdə təşkilat erkən nikahların baş verməsini pisləyib: “BMT-nin 1989-cu il tarixli Uşaq Hüquqları Konvensiyası 18 yaşına çatmamış şəxsin uşaq hesab olunmasını və bu yaşa çatmamış şəxsin nikahının BMT tərəfindən erkən nikah kimi müəyyən edilməsini nəzərdə tutur. İnsan hüquqları haqqında beynəlxalq paktlarda və konvensiyalarda müəyyən edilmiş standartlar erkən nikahları insan hüquqlarının pozulması kimi qiymətləndirir”.

UNİCEF-in Azərbaycan nümayəndəliyi bildirir ki, son illər mütəxəssislər və insan hüquqlarının müdafiəçiləri Azərbaycanda erkən nikahların artması ilə bağlı narahatlıqlarını ifadə edir: “UNİCEF-in Azərbaycan nümayəndəliyi Azərbaycanda erkən nikahlara yol verməmək və ya mane olmaq üçün lazımi tədbirlərin, o cümlədən profilaktik və qanunvericilik tədbirlərin həyata keçirilməsinə çağırır. Ənənəvi və mülki qanunların yenidən nəzərdən keçirilməsi, qız və oğlanlar üçün qanuni nikah yaşının 18 yaş həddində müəyyən edilməsi, bu tədbirlərin müvafiq peşəkarların, o cümlədən psixoloqların və sosial işçilərin dəstəyi ilə icma əsaslı xidmətlər vasitəsilə ilə icrasının təmin edilməsi üçün hökumət tərəfindən müvafiq tədbirlərin həyata keçirilməsinə ehtiyac var”.

UNİCEF-in Azərbaycan nümayəndəliyi bir daha Azərbaycanda uşaq hüququnun ən kobud şəkildə pozulması kimi qiymətləndirilən erkən nikahlarla mübarizə aparmaq üçün bütün maraqlı tərəfləri səylərini gücləndirməyə çağırıb.

Xatırladaq ki, qeyd edilən intihar hadisəsi noyabrın 28-də, saat 08:05 radələrində baş verib. Quba rayonunun Susay kəndində qeydiyyatda olan 1994-cü il təvəllüdlü Bənövşə Fərid qızı Fərzəliyevanın valideynləri onu heyvandarlıq fermasının dəmir çardağında özünü asmış vəziyyətdə tapıblar. Hadisəni araşdıran müstəntiqin bildirdiyinə görə, 15 yaşlı qız valideynlərinin onu sevdiyi şəxsə deyil, başqa birinə ərə vermələri səbəbindən intihar edib. İntihar edən şəxsin qız toyu noyabrın 25-də olub.