Sosial

Ana səhifə

Sosial

Həbsdə olan jurnalistin səhhətində yaranan problemlərlə bağlı mətbuat konfransı keçirilib

04 dekabr 2009 10:23 (UTC +04:00)

Bakı. Ramil Məmmədli, Hafiz Heydərov - APA. “Bizim yol” qəzetinin həbsdə olan əməkdaşı Müşfiq Hüseynovun səhhətində yaranan problemlərlə bağlı bu gün mətbuat konfransı keçirilib. APA-nın məlumatına görə, jurnalistin atası Tofiq Hüseynov oğlunun səhhətində yaranmış problemin onun dünyasını dəyişməsi ilə nəticələnə biləcəyini deyib. Onun sözlərinə görə, M. Hüseynov vərəm xəstəliyindən əziyyət çəkir, lakin Penitensiar Xidmətin rəhbərliyi, Ədliyyə Nazirliyinin Tibb Baş İdarəsinin rəisi Rafael Mehdiyev isə iddia edir ki, Müşfiqin səhhətində problem yoxdur: “Müşfiq Hüseynov hazırda Ədliyyə Nazirliyinin Müalicə Müəssisəsində saxlanılır. Lakin biz onun müalicə prosesindən razı deyilik. Həbsdə olduğu iki il ərzində onun vərəm xəstəsi olmasına məhəl qoymurlar”.

M. Hüseynovun bacısı Dilbər Qasımova isə bildirib ki, qardaşının ciyəri xəstəlikdən deşilib, ağır vəziyyətdədir: “Hüquq müdafiəçilərindən xahiş edirəm ki, onun azadlığa buraxılmasına kömək etsinlər. Çünki onun müalicəsi həbsxana şəraitndə aparıla bilməz. İki uşaq atasıdır, ailəsi kirayədə yaşayır. Böyük oğlu ikinci dərəcəli əlildir.”. D. Qasımova qardaşının əfv olunması üçün ölkə prezidentinə müraciət edəcəklərini də deyib.

Reportyorların Azadlığı və Təhlükəsizliyi İnstitutunun rəhbəri Emin Hüseynov da hüquq müdafiəçilərini M. Hüseynovun taqleyi ilə maraqlanmağa çağırıb.

Qeyd edək ki, Cinayət Məcəlləsinin 311.1-ci (rüşvət alma) maddəsi ilə ittiham olunan M. Hüseynov Əmək və Əhalinin Sosial Müdafiəsi Nazirliyinin vəzifəli şəxsləri barəsində rüsvayedici məlumatların “Bizim yol” qəzetində dərc edilməməsindən ötrü həmin nazirliyin aparat rəhbəri Rizvan Əliyevdən rüşvət tələb etməkdə təqsirli bilinib. O, 2007-ci il iyulun 24-də MTN əməkdaşları tərəfindən saxlanılıb. 2008-ci il yanvarın 21-də Ağır Cinayətlərə Dair İşlər üzrə Məhkəmənin hökmü ilə M. Hüseynov 6 il müddətinə azadlıqdan məhrum edilib.

Ədliyyə Nazirliyi Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov isə APA-ya açıqlamasında M. Hüseynovun ailə üzvlərinin səsləndirdiyi fikirlərlə razılaşmayıb. M. Hüseynovun məhkum olunmazdan əvvəl də vərəm xəstəliyindən əziyyət çəkdiyini vurğulayan M. Sadıqov onun həbsdə olduğunu müddətdə mütamadi olaraq həkim nəzarətində saxlanıldığını söyləyib: “Müşfiq Hüseynov hazırda vərəmə düçar olmuş məhkumlar üçün nəzərdə tutulan ixtisaslaşdırılmış müalicə müəssisəsində saxlanılır. O, iki nəfərlik palatada qalır, lazımi şərait yaradılıb. Müşfiq Hüseynov hazırda “Dots” proqramı üzrə müalicə kursu keçir və bu Beynəlxalq Qırmızı Xaç Komitəsinin mütəxəssislərinin nəzarəti altındadır. Həkimlərin dediyinə görə, Müşfiq Hüseynovun müalicəsində birinci sıra dərmanlardan istifadə edilir, hazırda onun səhhətində müsbət dinamika müşahidə olunmaqdadır”.

Müşfiq_Hüseynov