Sosial

Ana səhifə

Sosial

İstehlak bazarında saxlama müddəti 1 aydan 2 ilədək ötmüş ərzaq məhsulları aşkar edilmişdir

04 dekabr 2009 17:03 (UTC +04:00)

İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti istehlak bazarını keyfiyyətsiz və insan sağlamlığı üçün təhlükəli mallardan qorumaq məqsədilə nəzarət tədbirlərini davam etdirir.
Dövlət Xidməti tərəfindən dekabrın 3-də həyata keçirilən növbəti monitorinqlər zamanı

Bakının Suraxanı rayonunda

- Bazar küçəsi 1 ünvanında “Emin market”də;
- Əmircan qəsəbəsi, ev 8/6, mənzil 6 ünvanında “Dostluq market”də;
- Əmircan qəsəbəsi, M.Mustafayev 7 ünvanında yerləşən “Əkizlər market”də;
- Əmircan qəsəbəsi, M.Mustafayev küçəsində yerləşən “Ümid market”də;
Sumqayıt şəhərində
- 6-cı mikrorayonda D.İsmayılova məxsus ərzaq mağazasında
satışda 165 kiloqram saxlama müddəti ötmüş ərzaq məhsullarının olduğu müəyyən edilmişdir.
Dövlət Xidmətinin Əmircan qəsəbəsi, M.Mustafayev küçəsində yerləşən “Xəyal-R” firmasına məxsus topdansatış mağazasında və “Final market”də apardığı monitorinqlər zamanı isə 395 kiloqram saxlama müddəti 1 aydan 2 ilədək ötmüş kolbasa və kolbasa məmulatları, balıq kürüsü, pendir, yağ, xama və s. ərzaq malları aşkar edilmişdir.
Ümumilikdə, gün ərzində Dövlət Xidməti tərəfindən ümumi çəkisi 560 kiloqram saxlama müddəti ötmüş ərzaq məhsulları aşkar edilmiş, satışdan çıxarılaraq məhv edilmişdir.
Qanun pozuntusuna yol vermiş şəxslər barəsində Azərbaycan Respublikasının İnzibati Xətalar Məcəlləsinə uyğun olaraq inzibati cərimələr tətbiq olunacaqdır.
İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti istehlakçılara mal alarkən diqqətli olmağı, onların saxlama müddətinə, etiketlənməsinə xüsusi diqqət yetirməyi tövsiyə edir.
İstehlakçılardan istifadə müddəti ötmüş, keyfiyyətsiz malların satışı halları ilə rastlaşdıqda 498-15-01 və 498-15-04 nömrəli telefonlarla İstehlak Bazarına Nəzarət üzrə Dövlət Xidmətinə məlumat vermələri xahiş olunur.